Drejtori i të ashtuquajturës Zyre për Kosovën, Petar Petkoviq tha se kryeministri i Kosovës, Albin Kurti i vuri katër ultimatume Serbisë rreth mesazhit të tij të fundit për dialogun.
Petkoviq tha se Kurti ka njoftuar për përfundimin e dialogut dhe sipas tij, ka anuluar gjithçka që ishin marrë vesh në Bruksel për 8 vjet e fundit.
“Kërcënimet e Kurtit se kushti për vazhdimin e dialogut është që Beogradi të njoh Kosovën, të njoh krimet e pretenduara në Kosovë shkatërrojnë drejtpërdrejt dhe anulojnë çdo të ardhme të dialogut dhe kompromisit, veçanërisht në pozicionin e Kurtit se të mos lejojë formimin e Bashkimit të Komunave Serbe “, tha ai, raporton Tanjug.
Kujtojmë se në ekspozenë e tij të shpalosur para deputetëve, Kurti tha se nuk mund dhe nuk do të bëhet asnjë kompromis me Serbinë.
“Derisa punojmë në reforma brenda vendit, po ashtu do ta reformojmë edhe qasjen tonë jashtë vendit. Kosova është shtet i pavarur dhe sovran. Kompromiset që janë kërkuar e që kanë qenë të dëmshme janë bërë me Pakon e Ahtisaarit si çmim i paguar për shpalljen e pavarësisë. Asnjë kompromis tjetër nuk mund ta bëjmë e nuk do ta bëjmë. Kjo duhet të thuhet qartë dhe zëshëm në çdo tryezë e çdo takim nga secili prej nesh në mënyrë që të riparojmë dëmet që i janë shkaktuar shtetësisë në vitet e fundit, e të cilat kanë ndikuar te njohjet e reja dhe konsolidimi i shtetësisë”, tha Kurti të hënën në Kuvend.
Kurti përmendi edhe parimet e tij për dialogun, ku rënditeti katër kushte.
“I pari, duhet pranuar realiteti; i dyti, duhet pranuar e vërteta; i treti, duhet të ulemi si të barabartë; dhe i katërti, duhet të përfitojnë qytetarët”, ka thënë Kurti.
