Sot, 22 vjet më parë, NATO nisi sulmet ajrore ndaj caqeve të makinerisë serbe të luftës, për ta shpëtuar popullin e Kosovës nga gjenocidi.
Ajo ishte një ditë shprese për të gjithë shqiptarët, por jo edhe për Nesrete Vejsa-Nukën që humbi shumë familjarë.
“Kemi pasur shumë shpresë që në Kosovë do të futen forcat e NATO-s dhe ne do të shpëtojmë. Kemi shpresuar se gratë dhe fëmijët nuk do të preken”, fillon rrëfimin për RTV Dukagjinin, Nesrete Vejsa Nuka.
Gjakova ishte komuna që pësoi më së shumti në njerëz nga lufta. Nga 1 mijë e 22 viktimat në këtë komunë, në mesin e tyre ishin edhe 12 anëtarët e familjes së Nesrete Vejsa-Nukës.
“Kaluan 22 vite dhe dhimbja vazhdon të mbetet e madhe. Unë kam humbur 12 anëtarë të familjes me 1 prill. Kam humbur nusen e vëllait me 5 fëmijë, motrën me 3 fëmijë. Aty ka qenë e strehuar edhe nëna e nuses me motrën 14-vjeçare. Nusja e djalit të hallës me 3 vajzat po ashtu kanë humbur jetën”.
Se kishte humbur familjarët në një masakër, ajo thotë se e kuptoi vetëm tri ditë më vonë.
“Kisha një parandjenjë nga një ëndërr. E pashë në ëndërr që shtëpia e vëllait u dogj dhe ai fluturonte në tym. Mezi e kalova natën dhe prita të del dita. Menjëherë desha të shkojë te shtëpia e nënës. Burri nuk më la të shkoj dhe shkoi vetë. Kur arriti atje e pa që kishte shumë policë. I pyeti se çfarë ka ndodhur. Ata i kanë thënë ‘keni kërkuar NATO-n, ja çfarë ju bëri NATO’”, tha ajo.
I vetmi i mbijetuar i asaj masakre ishte Dren Caka.
“Kësaj masakre i ka shpëtuar djali i djalit hallës, Dren Caka. Ai kishte shpëtuar duke u plagosur në dorë”.
Si shumë raste në Kosovë, Nesretja thotë se edhe në rastin e familjes së saj u tradhtuan nga ata me të cilët janë rritur bashkë.
“Ne jemi rritur bashkë me ata serbë e malazez. Dreni thotë se aty kanë qenë shtatë policë e paramilitarë të lagjes. Si figura i ka njohur por me emra nuk i ka mbajtur në mend pasi ishte vetëm 10-vjeçar.”
Edhe pse sot është nënë e tre fëmijëve ajo nuk mund ta largojë dhembjen e së kaluarës.
“Kur i shoh mbesat e mia rrëqethem. Kujtoj nipat e vëllait dhe them si ka mundësi të ekzekutohen dhe masakrohen në atë mënyrë”, rrëfen më tej Nesrete Vesa-Nukaˆ
