Tre persona kanë mbetur të vdekur në Malishevë, si pasojë e shpërthimit të një bombole gazi.
Lajmin për Telegraminsot e ka konfirmuar Drejtori i Policisë për Rajonin e Gjakovës, Lumni Graishta.
Graishta bëri të ditur se dy nga viktimat janë fëmijë të moshës 9 dhe 12 vjeçare (djalë e vajzë), si dhe babai 35-vjeçar.
“Mund të konfirmoj që i kemi tre të vdekur. Dy fëmijët të moshës 9 dhe 12-vjeç dhe babai 35-vjeç”, ka deklaruar Graishta.
Ai bëri me dije se Policia ndodhet në vendngjarje.
Ndërkohë, zëdhënësi i Policisë, Sheremet Elezaj, ka bërë me dije se zjarri është lokalizuar tashmë.
Elezaj tha se po ndërmerren veprimet e nevojshme hetimore për të sqaruar rrethanat e rastit.
“Zjarri është lokalizuar dhe nuk është raportuar për pasoja të tjera. Lidhur me rastin është njoftuar edhe prokurori i shtetit dhe aktualisht janë duke u ndërmarrë të gjitha veprimet e nevojshme hetimore për të sqaruar rrethanat dhe shkaqet e kësaj ngjarjeje”, ka deklaruar Elezaj.
