Sot bëhen nëntë vjet nga ndarja nga jeta e veteranit të Ushtrisë Çlirimtare të Kosovës dhe atdhetarit të devotshëm, Haxhi Sutë Fazliaj, nga fshati Bokshiq i Klinës, një emër i lidhur ngushtë me sakrificën dhe rezistencën për lirinë e Kosovës.
Haxhi Sutë Fazliaj dha një kontribut të madh në luftën e UÇK-së, duke u rreshtuar në vijën e parë të frontit në zonën e Klinës, ku edhe u plagos gjatë përballjeve me forcat armike. Sakrifica e tij ishte familjare dhe brezore, pasi bashkë me të, edhe djemtë e tij u bënë pjesë e Ushtrisë Çlirimtare të Kosovës.
Njëri prej tyre ra dëshmor, duke e vulosur përjetësisht emrin e familjes Fazliaj në historinë e lavdishme të luftës për liri.
Me rastin e këtij përvjetori, te varri i Haxhi Sutë Fazliajt u zhvilluan homazhe përkujtimore, ku morën pjesë familjarë, shokë, bashkëluftëtar.
Në mesin e tyre ishte edhe djali i tij, Bujar Fazliaj, i cili, edhe pse në moshë shumë të re, u rreshtua në radhët e UÇK-së, duke ndjekur rrugën e sakrificës dhe atdhedashurisë së babait dhe familjes së tij.
Bujari, djali i Haxhiut
Figura e Haxhi Sutë Fazliajt mbetet simbol i qëndresës, guximit dhe përkushtimit për lirinë e Kosovës, ndërsa vepra e tij vazhdon të kujtohet me respekt të thellë nga brezat që gëzojnë sot lirinë e fituar me gjak dhe sakrificë.
