Prishtinë, 8 Mars 2025 – Me rastin e Ditës Ndërkombëtare të Gruas, kryeshefi ekzekutiv i Termokosit, Fisnik Osmani, ka shprehur mirënjohjen dhe respektin e tij për të gjitha gratë e ndërmarrjes, duke vlerësuar kontributin e tyre të jashtëzakonshëm në zhvillimin e kompanisë.
Në këtë ditë të veçantë, Termokos ka zgjedhur të bëjë një gjest simbolik e domethënës, duke dhuruar aksesorë të punuar me dorë nga gratë e Qendrës për Promovimin e të Drejtave të Grave (QPDG). Këto punime mbartin brenda vetes historinë dhe forcën e grave të mbijetuara nga dhuna seksuale gjatë luftës në Kosovë, duke shërbyer si simbol i dhimbjes, rezistencës dhe fuqisë së tyre.
“Duke i mbështetur dhe promovuar këto punime, ne kontribuojmë në ngritjen e zërit për të mbijetuarat dhe përkujdesjen ndaj tyre, duke mos lejuar që historia të harrohet,” u shpreh Osmani në urimin e tij.
Ai falënderoi të gjitha gratë e Termokosit për përkushtimin, profesionalizmin dhe punën e palodhshme, duke theksuar se roli i tyre është një shtyllë kyçe në suksesin e ndërmarrjes.
Gëzuar 8 Marsin!
Termokos – Kryeqyteti Prishtina
