Presidenti i Serbisë, Aleksandar Vuçiq, ka ashpërsuar retorikën ndaj studentëve dhe qytetarëve që po protestojnë kundër regjimit të tij, duke i akuzuar për “veprime të dhunshme” dhe duke paralajmëruar se shteti do të reagojë “kur të vijë momenti i fundit”, me përdorimin e forcës.
Në një intervistë për televizionin pro-qeveritar Pink, Vuçiq përshkallëzoi gjuhën e tij autoritare duke përdorur frikësimin si mjet politik në përballje me protestat studentore dhe qytetare.
Në vend të dialogut, presidenti i Serbisë vazhdon të paralajmërojë shtypje dhe ndjekje penale ndaj kundërshtarëve të tij politikë dhe qytetarëve aktivistë.
“Askush nga ne nuk është sadist që dëshiron të përdorë dhunë, por shteti ka monopol mbi forcën fizike. Dhe ai moment do të vijë. Shpresoj që të mos detyrohemi ta përdorim, por jemi të gatshëm për të.”
Ai theksoi se Serbia është sjellë më demokratikisht ndaj protestuesve “se 95 për qind e vendeve të Bashkimit Evropian”, ndërsa i quajti protestat e studentëve përpara ndërtesës së Radio Televizionit të Serbisë (RTS) si “krim pa precedent”.
Vuçiq deklaroi gjithashtu se “revolucioni i ngjyrave në Serbi ka përfunduar”, duke pretenduar se më 15 mars ishte planifikuar një atentat ndaj tij nga grupe kriminale, për të cilin tha se kishte “zbuluar gjithçka”.
“Atë ditë u përgatit eliminimi im. Nuk po flas për studentët, por për disa grupe që bashkëpunonin me struktura shtetërore,” tha ai.
Presidenti serb sulmoi dhe profesorët që mbështesin protestat, duke pretenduar se ata “marrin para nga studentët e huaj për provime”, ndërsa studentëve vendas nuk u ofrojnë as mësim online. Ai paralajmëroi hetime dhe ndjekje penale:
“Kjo është për burg dhe do të shihni shumë shpejt si do të duket kjo.”
Lidhur me akuzat për përdorimin e “armëve zanore” në protestën e 15 marsit, Vuçiq i quajti pretendimet si “budallallëqe”, duke shtuar se edhe “Shërbimi Federal i Sigurisë i Rusisë (FSB)” e kishte hetuar ngjarjen dhe konfirmuar se nuk kishte pasur përdorim force të tillë – një deklaratë që vetëm shton dyshimet për lidhje të ngushta me shërbimet sekrete ruse.
