Kryetari i Kuvendit të Kosovës, Glauk Konjufca së fundmi ka bërë deklarata të çuditshme, njërën sa i përket zgjedhjeve lokale e tjetrën lidhur me ministrat dhe qeverinë e udhëhequr nga kryeministri Albin Kurti.
Konjufca në një deklaratë të tijën në Kuvendin e Kosovës kur po mbahej seanca plenare ka thënë se qeveria nuk është serioze dhe është pajtuar me shefin e deputetëve të Partisë Demokratike të Kosovës, shkruan lajmi.net.
Ai ka thënë se ministrat duhet të jenë në sallën e Kuvendit sepse ndryshe nuk mund të punohet.
“Nuk e kemi më duket përfaqësuesin e qeverisë këtu. Po për besë jo serioze, po pajtohem me Abelardin kësaj radhe. Duhet të jenë ministrat për besë me i prezantu projektligjet se nuk mujmë me punu si Kuvend i Republikës së Kosovës kështu. Shkojmë me një pauzë prej 20 minuta derisa qeveria të bëhet pak më serioze”, ka thënë Konjufca.
Ditë më parë, Konjufca ka dhënë edhe një deklaratë tjetër që iu është komentuar në media. Ai pranoi me lehtësi se Partia Demokratike e Kosovës dhe Lidhja Demokratike e Kosovës i kanë fituar zgjedhjet.
Më tutje, ai Aleancën për Ardhmërinë e Kosovës dhe Lëvizjen Vetëvendosje i ka vendosur në rend të dytë.
“Mendoj që në këto zgjedhje lokale, PDK me LDK janë fituese të zgjedhjeve lokale, diqysh sikur barabar, kurse AAK-ja me Vetëvendosjen janë në rend të dytë të partive politike”, deklaroi Konjufca në një paraqitje televizive.
Nuk dihet kjo nëse është një çarje e re midis Kurtit e Konjufcës, por raportime të tilla kishte pasur edhe në vitin 2020, por Kurti e Konjufca kishin thyer heshtjen e gjatë me publikimin e një fotografie, ndonëse këto çarje nuk i kishin pohuar e mohuar asnjëri për goxha një kohë të gjatë.
