Koordinatori për vaksinim në sallën “1 Tetori” në Prishtinë, Niman Bardhi, ka deklaruar se në Kosovë, deri sot, me dozat e vaksinës kompanive farmaceutike Pfizer dhe BioNTech janë vaksinuar rreth 3,500 persona.
“Deri më tani, nga sasia e dedikuar prej 4,680 dozave të vaksinave, kemi shpenzuar 3,500. Në dispozicion kemi edhe 1,180 vaksina, po flas për kontingjentin e parë”, tha Bardhi në një konference për media.
Zyrtarë të Qeverisë kanë pohuar se javën e ardhshme pritet të arrijë kontingjenti tjetër i vaksinave, që përsëri do të jetë donacion.
Procesi i imunizimit me këtë lloj të vaksinave në Kosovë ka nisur më 5 maj, pas pranimit të 4,680 vaksinave të kompanisë Pfizer dhe BioNTech.
Kjo është pjesa e parë e 95,000 dozave që Bashkimi Evropian ka ndarë për Kosovën, në kuadër të mbështetjes së vaksinimit në vendet e Ballkanit Perëndimor.
