Përmes një takimi virtual, sot edhe në mënyrë solemne është bërë inaugurimi i grupit të miqësisë Kosovë-Tajvan në Parlamentin e Kosovës dhe Parlamentin e Tajvanit.
Në këtë takim përveq deputetëve kosovarë dhe tajvanez ka marrë pjesë edhe Zëvendësministri i Punëve të Jashtme të Tajvanit, Harry Ho-jen Tseng.
Ai ka theksuar se Kosova dhe Tajvani morën pjesë në Samitin e Demokracive, që u organizua nga Presidenti i Shteteve të Bashkuara të Amerikës, Joe Biden, si një mirënjohje ndaj shteteve tona për arritjet në forcimin e demokracisë.
Zëvendësministri Ho-jen Tseng ka uruar të dy parlamentet për krijimin e grupit të miqësisë.
Ndërkaq, fjalën e ka marrë edhe përfaqësuesi i Tajvanit në Hungari, ambasadori, Liu Shih-Chung, i cili këtë ditë e ka cilësuar si historike për të shtetet.
Ndërkaq, në emër të grupit të miqësisë në Parlamentin e Kosovës, deputetja Blerta Deliu ka thënë se është kënaqësi e madhe për ne që sot mbajmë takimin e parë mes deputetëve të Kuvendit të Kosovës dhe Parlamentit të Tajvanit, duke inauguruar grupet e miqësisë që bazohen në parimet e lirisë, demokracisë dhe prosperitetit të kombeve tona.
“Kosova dhe Tajvani kanë shumë të përbashkëta. Ne kemi kaluar kohë të mira dhe të këqija në udhëtimet tona për të ndërtuar vende të forta që u mundësojnë qytetarëve të saj të jetojnë të lirë dhe në prosperitet, ka thënë ajo.
Sipas saj, Kosova është një vend properëndimor, një demokraci që ekziston sot si shtet falë mbështetjes së Shteteve të Bashkuara të Amerikës, Bashkimit Evropian dhe demokracive të tjera në botë.
“Themelimi i një grupi miqësie ndërmjet Kosovës dhe Tajvanit është një pasqyrim i orientimit tonë të politikës së jashtme dhe themeleve të tij tradicionale”, ka thënë ajo.
Ajo ka theksuar se Tajvani nuk është një vend i panjohur për Kosovën, duke kujtuar mbështetjen e Tajvanit për refugjatët e Kosovës që ishin larguar nga shtëpitë e tyre nga lufta, e ncitur nga Serbia.
“Ju jemi mirënjohës që në ditën e shpalljes së Pavarësisë së Kosovës, ishit të parët që e njohët dhe i dhatë mbështetje shtetit të Kosovës. Ju lusim me dashamirësi që të loboni te aleatët tuaj që ende nuk e kanë njohur Kosovën si shtet dhe t’i bindni se kjo është rruga e duhur”, ka thënë Deliu.
Ndrëkaq, kryetari i grupit të miqësisë në Parlamentin e Tajvanit, Dr. Lo Chih-cheng ka theksuar se sot shënon një moment historik për Tajvanin dhe Kosovën.
“Kosova dhe Tajvani ndajnë shumë të përbashkëta në luftën e tyre për pavarësi, vlera demokratike, mbijetesë ekonomike dhe njohje ndërkombëtare. Në fakt, Tajvani ishte në mesin e disa vendeve që njohën pavarësinë e Kosovës në vitin 2008”, ka thënë si.
Sipas Chih-cheng Tajvani dhe Kosova janë të gjitha në një pozicion gjeostrategjike, diplomatike dhe të sigurisë mes fuqive të mëdha.
“Vetëkuptohet se të dy vendet janë përballur vazhdimisht me kërcënime të sigurisë kombëtare dhe sfida diplomatike nga forcat fqinje, duke ruajtur pamëshirshëm vlerat universale të lirisë dhe demokracisë, qeverisjes transparente dhe hapjes ndaj botës”, ka thënë ai.
Tash e një kohë Shtetet e Bashkuara të Amerikës kanë bërë presion në shumë vende të botës për të avancuar marrdëhniet me Tajvanin. Kongresi, Senati, Parlamenti Evropian dhe i shumciës së shteteve Evropiane tashmë kanë grupet e tyre të miqësisë.
