Një burrë nga Kalifornia që mbyti dy djemtë e tij me autizëm, është dënuar me mbi dy shekuj burgim për planifikimin e vrasjes së partneres dhe fëmijëve. Atë e pret akoma dënimi për dy pika tjera të aktakuzës që rëndojnë mbi të.
Ali F. Elmezayen, 45-vjeç, ka marrë dënimin maksimal për mashtrim, vjedhje identiteti, shpëlarje parash dhe planifikim të vrasjeve, transmeton Telegrafi.
“Ai është një gënjeshtar shumë i zoti dhe nuk është asgjë më tepër sesa një vrasës brutal. Për të vetmen gjë që ankohet është se u kap nga autoritetet”, ka thënë gjykatësi John F. Walter.
Elmezayen për veten dhe familjen gjatë vitit 2012 kishte siguruar policën e sigurimit të jetës që kapte vlerën e mbi tre milionë dollarë, shkruan NBC News.
Gjykatësi gjatë seancës ka publikuar incizimet e bisedave telefonike, ku Elmezayen dëgjohet duke pyetur zyrtarët e kompanisë së sigurimit nëse polica e tij është ende aktive – a do të shpaguhet në rast se ndonjë anëtar i familje humb jetën dhe nëse ekspertë të kompanisë do të hetojnë “aksidentin” e mundshëm.
E vetëm dy javë më vonë pasi vuajti dënimin dyvjeçar me burgim, Elmezayen ka kërcyer nga porti detar i Los Angeles ku humbën jetën dy djemtë e tij me autizëm, Elhasan, 13-vjeç dhe 8-vjeçari Abdelkrim.
E ëma e djemve, Rabab Diab, i mbijetoi “aksidentit” pasi që një peshkatar i kishte hedhur jelekë shpëtimi. E Elmezayen në veturë kishte lënë dritaren e hapur me qëllim që të mund të ikë. Dyshja kishin edhe fëmijën e tretë të përbashkët, i cili në kohën e vrasjeve kishte shkuar për kamping.
“I pakënaqur me gjendjen financiare dhe atë në familje, Elmezayen kishte mashtruar duke marrë miliona dollarë nga polica e sigurimit, e më pas ishte hedhur në det me familje me qëllim që të mund t’i tërheq paratë”, ka thënë avokati Nick Hana.
Ai përveç se është dënuar me 212 vite burgim, Elmezayen duhet të paguaj dëmshpërblimin prej 261.751 dollarë. Atë e pret akoma gjykimi për akuzat për vrasje, ku pritet të dënohet me burgim të përjetshëm pa mundësi të dënohet me kusht.
