Mijëra qytetarë austriakë u mblodhën të martën në mbrëmje në një vigil me qirinj për të nderuar 10 viktimat e një sulmi tragjik me armë zjarri në një shkollë të mesme në qytetin e Grazit.
Policia konfirmoi se sulmuesi, një 21-vjeçar dhe ish-nxënës i shkollës Dreierschützengasse, vrau veten në një prej tualeteve të shkollës pak pas sulmit.
Dhjetë persona humbën jetën në sulm – gjashtë femra dhe tre meshkuj në vendngjarje, ndërsa një femër e katërt ndërroi jetë më vonë në spital. Sipas agjencisë së lajmeve APA, shtatë prej viktimave ishin nxënës, transmeton Klankosova.tv.
Ndërkohë, dymbëdhjetë të tjerë mbetën të plagosur, disa prej tyre në gjendje të rëndë. Autoritetet thanë se ende po hetojnë motivin e autorit të sulmit.
Sheshi kryesor i Grazit u mbush me mijëra qytetarë që ndezën qirinj dhe qëndruan në heshtje, të prekur thellë nga dhimbja kolektive. Në një atmosferë të zymtë, të rinj dhe të moshuar, të vetëm ose të përqafuar me të afërmit e tyre, u lutën, qajtën dhe reflektuan.
Qirinjtë u vendosën me kujdes nga vullnetarët në shkallët e shatërvanit të Kryepeshkopit Johann, një simbol i zemrës së qytetit të vjetër, përballë bashkisë së Grazit. Të martën mbrëma, ai shatërvan u kthye në një pikë qendrore të zisë dhe unitetit.
“Kur dëgjon për diçka kaq të tmerrshme, nuk mund të mos ndjesh dhembshuri. Ndoshta mund të kishe njohur dikë,” tha Felix Platzer, një qytetar pjesëmarrës në vigjilje, për agjencinë Reuters.
“Kjo është një shenjë solidariteti. Pikëllimi është më i përballueshëm kur ndahesh me të tjerët”, shtoi ai.
