Aksioni i sotëm i Policisë dhe Prokurorisë Themelore në Prishtinë, lidhur me rastin “Sekiraqa-Capat”, rezultoi me një person të arrestuar, i cili dyshohet se ka qenë i përfshirë në incidentin e armatosur në shtator të vitit të kaluar, ku mbeti i vrarë një person dhe disa të tjerë u plagosën.
Siç mëson ekskluzivisht Klankosova.tv, personi i ndaluar është anëtar i familjes Gashi.
I dyshuari është familjar i Capave, të cilëve iu mbeti i vdekur, djali Premtim Gashi, në përballjen që patën me Sekiraqët.
Ai dyshohet për veprën penale vrasje e rëndë në tentativë dhe për armëmbajtje pa leje.
Gjatë kontrollit, atij i është gjetur dhe sekuestruar një armë zjarri, që dyshohet se mund të jetë përdorur në kryerjen e veprës penale.
Kujtojmë se familjet Sekiraqa dhe Capat, të njohura edhe si grupe që janë në konflikt qe një kohë.
Nga familja Sekiraqa, kishte mbetur i plagosur personi më me ndikim në grupin e tyre, Salih Sekiraqa, dhe po ashtu edhe Korab Gashi (vëllai i viktimës), Robert Llumnica dhe Valdrin Ademi.
Ndryshe, këtij konflikti tragjik, i kishte paraprirë një plagosje, ku i dyshuari ishte djali i Salihut, Shkumbin Sekiraqa, ndërsa viktimë Pajtim Gashi.
Vërejtje: Personat e përmendur në këtë artikull, sipas ligjeve të Republikës së Kosovës, konsiderohen të pafajshëm deri në vendimin e formës së prerë nga gjykata.
