Në një vizitë zyrtare në Kroaci, Kosova dhe Kroacia kanë nënshkruar gjashtë marrëveshje bashkëpunimi, përfshirë edhe njohjen reciproke të patentë shoferëve. Ceremonia e nënshkrimit u zhvillua në prani të kryeministrit të Kosovës, Albin Kurti, dhe autoriteteve kroate.
Marrëveshjet, të nënshkruara nga ministrat përkatës të të dy vendeve, përfshijnë fusha strategjike si lehtësimi i qarkullimit, bashkëpunimi ekonomik, kulturor dhe teknologjik, duke reflektuar një angazhim të ndërsjellë për të forcuar lidhjet mes dy vendeve.
Lajmin e bër publik Ambasadori në Kroaci Martin Berisha:
Kroacia dhe Kosova vazhdojnë të ndërtojnë marrëdhënie të ngushta dhe partneritet! Kryeministri i Kosovës Albin Kurti u shpreh se vullnetin dhe gatishmërinë që e kemi gjithmonë për bashkëpunim, i kthyem në marrëveshje konkrete ndërmjet dy vendeve tona, e të cilat do t’i forcojnë më tej lidhjet e ndërsjella dhe do ta përmirësojnë mirëqenien e qytetarëve tanë.
Ministri ynë i Financave, Punës dhe Transfereve, Hekuran Murati dhe ministri i Punëve të Brendshme, Xhelal Sveçla, nënshkruan sot me homologët e tyre marrëveshje për sigurimet shoqërore dhe protokollin përkatës për zbatim, për njohjen dhe shkëmbimin e patentave të shoferëve, bashkëpunimin në mbrojtjen kundër fatkeqësive natyrore, teknike dhe teknologjike, bashkëpunimin ndërmjet agjencive tona të forenzikës dhe ndërmjet Akademisë Policore të Kroacisë dhe Akademisë së Kosovës për Siguri Publike për forcimin e bashkëpunimit në fushën e arsimit dhe të kërkimit shkencor.
Ndërkaq me ministren e Industrisë, Ndërmarrësisë dhe Tregtisë znj. Rozeta Hajdari u zhvillua në bashkëpunim me Odën ekonomike të Kroacisë Forumi i dytë Ekonomik Kosovë-Kroaci.
Kryeministri i Kosovës, Albin Kurti, u takua me përfaqësuesit e komunitetit shqiptar në Kroaci në hotelin “Westin” në Zagreb.
Ky takim forcon lidhjet në mes diasporës dhe institucioneve të Kosovës, i cili ofron mundësi për dialog të hapur mbi çështje të rëndësishme për shqiptarët që jetojnë në Kroaci.
