Duket se populli i Kosovës dalëngadalë po fillon të kuptojë shijen e hidhët të mashtrimit më të madh politik që nga paslufta. Por, edhe nëse realiteti është i hidhët, nuk ka pse të jetë fiksionaliteti. Më poshtë keni një utopi 65 ditëshe për punët e mira të Qeverisë Kurti II.
Qeverisë Kurti II i mjaftuan vetëm disa ditë për të ri-vendosur masën e Reciprocitetit të plotë tregtar, ekonomik e politik ndaj Republikës së Serbisë. Një gjë e tillë ndodhi pavarësisht piskamave të ashpra kundërshtuese nga pala serbe, dhe pavarësisht hezitimeve nga ana e diplomatëve të BE-së të cilët më pas u bindën nga argumentet e shtruara nga kryeministri.
Qeveria Kurti II i qëndroi pas bindjeve të shprehura kundër fusnotës dhe refuzoi të nënshkruante dokumentet për liri të lëvizjes me vendet fqinje në të cilat nuk njihej pavarësia e Kosovës.
Qeveria Kurti II nuk pranoi as të dëgjonte për ndonjë takim të mundshëm me Serbinë pa u plotësuar një varg kërkesash të rëndësishme. Kërkim-falja për krimet e luftës e para, dhe dëmshpërblimet e luftës e dyta.
Kryeministri Albin Kurti i ndaloi anëtarët e kësaj partie që të merrnin pjesë në zgjedhjet e Shqipërisë dhe uroi menjëherë fituesin e këtyre zgjedhjeve, Edi Ramën për fitoren.
Kryeministri Kurti refuzoi kategorikisht që të vazhdohej praktika e pagesës së rrymës për serbët që jetojnë në Veri të vendit, e të cilët dyshohet se po e përdorin energjinë elektrike falas edhe për të “rrëmuar kriptovaluta”.
Ministria e Punëve të Jashtme bën postime serioze diplomatike në Twitter dhe ato 270 karaktere të lejuara i dalin e i teprojnë. Anglishtja e përdorur është e përkryer.
Kryeministri Kurti në Ditën kundër Homofobisë dhe Transfobisë nuk shkruan vetëm në Twitter për t’u so’idarizuar por edhe në Facebook, rrjetin social më popullor në Kosovë.
Kurti denoncoi deklaratat fashiste të para dy dekadave të bëra nga presidenti i Serbisë, Aleksandër Vuçiq.
Përgjatë 65 ditëve në pushtet, Kurti ka sqaruar hapur procesin e ndryshimit të disa qëndrimeve të tij para gazetarëve të interesuar.
Qysh prej ardhjes në pushtet, kryeministri Kurti është zotuar se aktivistët dhe familjarët e tyre nuk do të punësoheshin madje as si këshilltarë politikë në Qeveri. Analistët kanë thënë se ky zotim përbën diskriminim ndaj aktivistëve të partisë së tij, por Kurti është përgjigjur se ky diskriminim ishte i nevojshëm që të vendosej një praktikë tjetër për të mirën e të gjithë qytetarëve.
Kryeministri Kurti i kërkon dorëheqjen Shpejtim Bulliqit nga Podujeva në mënyrë që të vazhdohej puna e lënë në gjysmë në Komisionin për Korrigjimin e Demarkacionit me Malin e Zi. Bulliqi që kishte qenë kryetar edhe më herët, e pranon detyrën, dhe atij i bashkohet edhe Florim Isufi.
Pas angazhimit të kryeministrit Kurti, arrihet që të nënshkruhet një kontratë me Pfizer/BioNTech për 1 milion doza vaksinash.
