Ish-kandidati për deputet i Kuvendit të Kosova, Rasim Smajlaj, ka reaguar publikisht lidhur me debatin për postin e Presidentit të Republikës, duke ngritur çështjen e përfshirjes së figurave me kontribut historik në këtë proces, përfshirë edhe emrin e Ramush Haradinaj.
Në një deklarim publik, Smajlaj e ka cilësuar qëndrimin e familjes Jashari, e cila ka bërë të ditur se nuk kanë kandidat për president, si një akt të përgjegjshëm dhe me peshë kombëtare.
“Familja Jashari është simbol i sakrificës dhe i lirisë dhe i përket gjithë kombit, jo një partie apo ideologjie të caktuar,” ka theksuar ai.
Megjithatë, ai ka ngritur pyetjen pse, sipas tij, në këtë debat nuk po përmendet familja Haradinaj dhe kontributi i saj në luftë dhe shtetndërtim.
Smajlaj ka nënvizuar se familja Haradinaj, ashtu si familja Jashari, tejkalon kufijtë partiakë dhe nuk duhet parë si pronë e Aleanca për Ardhmërinë e Kosovës apo e ndonjë subjekti tjetër politik.
“Ramush Haradinaj nuk duhet parë vetëm si figurë partiake, por si figurë shtetformuese, me kontribut në luftën për liri, në ndërtimin e institucioneve dhe në përfaqësimin ndërkombëtar të Kosovës,” ka deklaruar Smajlaj.
Ai ka theksuar se nuk është votues dhe as simpatizant i AAK-së, por e sheh si detyrim qytetar të kërkojë një debat më të hapur për figura që mund të kenë rol unifikues.
Sipas tij, Kosova ka nevojë për një president që përfaqëson unitetin kombëtar dhe jo kompromiset politike.
“Kosova sot nuk ka nevojë për president të kompromisit politik. Ka nevojë për president të unitetit kombëtar. Dhe në këtë debat, emri i Ramush Haradinajt nuk duhet të anashkalohet,” ka përfunduar Smajlaj.
Deklarata e tij vjen në një kohë kur çështja e presidentit të ardhshëm pritet të bëhet një nga temat kryesore të debatit politik në vend
