Asambleistja e Partia Demokratike e Kosovës në Istog, Kaltrina Arifaj, ka reaguar publikisht ndaj ish-kryetarit të Skenderajt, Bekim Jashari, duke shprehur zhgënjimin e saj për mungesën e një reagimi të tij lidhur me protestën e mbajtur në përkrahje të çlirimtarëve.
Në një reagim publik, Arifaj fillimisht ka shprehur respekt për familjen Jashari, duke theksuar rëndësinë simbolike dhe historike të saj, ndërsa më pas ka kritikuar heshtjen e Bekim Jasharit në një moment që ajo e cilëson si të ndjeshëm për vendin.
“Me keqardhje po e them se sot prisja zërin tuaj. Prisja një reagim, një qëndrim, një mbështetje për protestën e sotme në përkrahje të çlirimtarëve,” ka deklaruar Arifaj.
Sipas saj, mungesa e reagimit publik në situata të tilla përcjell mesazh dhe mund të interpretohet si qëndrim në vetvete.
“Heshtja juaj në një moment të tillë lë shumë për të dëshiruar. Ka raste kur fjala është përgjegjësi, e mosreagimi mesazh më vete,” ka shtuar ajo.
Arifaj ka paralajmëruar gjithashtu se qëndrimet apo mungesa e tyre në momente të rëndësishme mbesin pjesë e kujtesës historike.
“Gabimet që bëhen në kohë të rëndësishme mbesin në histori dhe nuk shlyhen lehtë,” përfundon reagimi i saj.
