Ish-presidenti i Kosovës, Fatmir Sejdiu, ka kujtuar dy etapa të historisë së Kosovës, atë të lirisë dhe pavarësisë, transmeton Gazeta Sinjali.
Sejdiu ka shkruar se Kosova arriti të organizohej e të dëshmohej atëherë kur cenohej qenia e saj.
“Përpjekjet tona ishin për të ruajtur jetën brenda vendit, dhe për të realizuar qëllimin tonë për liri, pavarësi dhe demokraci. Përcaktimi dhe përkushtimi ynë, fituan përballë atyre që nuk zgjidhnin as mjete, e as mënyra për të realizuar politikë e projekte të vazhdueshme të spastrimit etnik dhe të zhbërjes së Kosovës”, ka shkruar Sejdiu.
Kurse ai ka shtuar se pas përkrahjes ndërkombëtare Kosova arriti ta shpallte edhe pavarësinë.
“17 Shkurti 2008, është realizimi i projektit të madh politik të shqiptarëve të Kosovës, të cilit i printe Presidenti Dr. Ibrahim Rugova, për Liri, Pavarësi dhe Demokraci. Është realizimi i amanetit të komandantit legjendar Adem Jashari”, ka shkruar Sejdiu.