Kryeministri Edi Rama deklaroi sot nga Rinasi se “kemi nisur bisedat për të sjellë në Shqipëri fabrikën e prodhimit të vaksinave “Sinovac””.
Në konferencën për shtyp në aeroportin ndërkombëtar “Nënë Tereza” ku mbërritën 192 mijë dozat e para të vaksinës antikovid “Sinovac” nga Turqia, Kryeministri Rama theksoi se “jemi këtu së bashku në një moment shumë të rëndësishëm në luftën kundër pandemisë”.
“Përpara se të jap disa shpjegime lidhur me dozat e reja që sapo kanë zbritur në vendin tonë dëshiroj të ndaj me ju një tjetër lajm shumë të mirë: njëkohësisht kemi nisur edhe bisedat për të sjellë në Shqipëri fabrikën e prodhimit të vaksinave”, – tha Rama.
“Një fabrikë e teknologjisë së lartë, e cila aktualisht është një ndër kompanitë më të mëdha farmaceutike në botë, kompania farmaceutike që bën edhe distribucionin e vaksinës ‘Sinovac’, por që në njëjtën kohë është prodhuese e shumë vaksinave të tjera dhe produkteve të tjera farmaceutike”, – nënvizoi Rama.
Kryeministri Rama u shpreh se, “me këtë kompani ne kemi nisur bisedimet për të sjellë në Shqipëri një investim shumë të rëndësishëm jo vetëm për këtë moment, por edhe për të ardhmen”.
“Një fabrikë prodhuese, e cila do të hapë një tjetër faqe të rëndësishme në zhvillimin e sektorit të Shëndetësisë në vendin tonë dhe do të jetë një pikë shumë e rëndësishme referimi për prodhime të cilësisë më të lartë”, – tha Rama.
“Fabrika në fjalë nuk është një fabrikë që u ndërtua sot që ra pandemia, është një fabrikë që ka një traditë shumë shumëvjeçare, një kompani me traditë e themeluar që në vitin 1700 e ca. Së dyti, flasim për prodhim produktesh speciale farmaceutike ku hyn vaksina e gripit, hepatitit dhe të tjera, dhe të tjera produkte”, – tha Rama.
Kryeministri Rama tha se “mos mendoni se historia mbyllet kaq kollaj, pasi sipas gjaseve vaksina antikovid do të jetë një vaksinë që do të behet rregullisht si një vaksinë gripi”.
“Nga ana tjetër nuk besoj se do filloni të ankoheni ç’na duhet fabrika, pasi nuk do e paguani ju fabrikën, nuk do rëndojë në buxhetet tuaja dhe prodhimet janë të rralla që lehtësisht mund të eksportohen dhe patjetër mbulojnë dhe nevojat e tregut vendas. Në këtë proces fiton Shqipëria, shëndetësia jonë dhe të gjithë bashkë ju me mua”, tha Rama.
