Pjesëtari i policisë së Kosovës, Dylot Brahimi, i ka falënderuar krejt ata që e kanë përkrahur këtyre ditëve.
“Të nderuar kolegë, miq, dhe të gjithë ata që më kanë përkrahur,
Sot qëndroj para jush me një ndjenjë të thellë mirënjohjeje dhe krenarie. Është një ndjenjë që buron nga përkrahja e jashtëzakonshme që kam marrë gjatë rrugëtimit tim në shërbim të Policisë së Shtetit. Çdo fjalë inkurajuese, çdo dorë që më është zgjatur, çdo besim që më është dhënë — të gjitha kanë lënë gjurmë të pashlyeshme në përkushtimin tim për këtë detyrë”, tha Brahimim njofton Klankosova.tv.
Brahimi theksoi se puna në polici nuk është thjesht një profesion.
“Është një thirrje. Një përgjegjësi që bartim me nder dhe me vendosmëri, në mbrojtje të rendit, sigurisë dhe dinjitetit të qytetarëve tanë. Por kjo rrugë nuk është asnjëherë e lehtë. Ka sfida të mëdha, sakrifica të shumta, dhe momente që të vënë në provë edhe më të fortin ndër ne”.
“Prandaj, përkrahja që kam marrë nga ju — kolegët e mi, familja, miqtë, dhe komuniteti — ka qenë një forcë e pashtershme që më ka shtyrë përpara. Ju më keni dhënë motivimin që të jem më i mirë çdo ditë, më keni rikujtuar pse kjo punë ka kaq shumë rëndësi”, theksoi ai.
Pjesëtari i Policisë shtoi se është i vendosur të vazhdojë me integritet dhe përkushtim, njofton Klankosova.tv.
“Sot, më shumë se kurrë, ndihem i vendosur të vazhdoj me integritet, me përkushtim dhe me nder. Të punoj me gjithë zemër për një polici të drejtë, transparente dhe gjithmonë pranë qytetarëve. Ju falënderoj nga zemra për këtë mbështetje që më jep forcë dhe besim. Le të ecim përpara së bashku — me besim, unitet dhe përkushtim ndaj të mirës së përbashkët. Faleminderit!”.
Ndaj policit Dylot Brahimi, Serbia ka lëshuar fletarrest.
Ministri i Brendshëm i Serbisë, Ivica Daçiq, tha dje se ministria që ai drejton ka lëshuar një urdhër arresti për oficerin e policisë së Kosovës, i cili, pala serbe pretendon se sulmoi fizikisht dhe plagosi një nxënës serb të shkollës së mesme në veri të Mitrovicës të premten.
