Kryetari i Partisë për Liri, Drejtësi dhe Mbijetesë, Nenad Rashiq, e ka dënuar incidentin e djeshëm në Mitrovicën e Veriut, gjatë festimeve të maturantëve. Ai ka paralajmëruar se do t’i drejtohet Inspektoratit Policor për hetim të plotë.
Sipas Rashiqit, ndërhyrja e dyshuar nga një polic ndaj një maturanti përbën goditje ndaj vlerave demokratike dhe mund të ndikojë negativisht në marrëdhëniet tashmë të brishta në veri të vendit.
“Përdorimi i forcës ndaj të rinjve, në momente simbolike si festimet e diplomimit, është i papranueshëm”, ka thënë Rashiq, duke njoftuar se të hënën do të dorëzojë një kërkesë zyrtare tek Inspektorati i Policisë për hetim urgjent dhe gjithëpërfshirës.
Ministri në detyrë për Komunitete dhe Kthim gjithashtu bëri të ditur se ka komunikuar me ministrin në detyrë të Brendshëm, Xhelal Sveçla, dhe i ka kërkuar atij të marrë të gjitha masat e mundshme për të parandaluar që raste të tilla të ndodhin përsëri.
Një ditë më parë, në veri pati reagime të shumta për mënyrën se si polici ndërhyri gjatë defilimit të maturantëve të Mitrovicës së Veriut. Gjatë ditës, politikani serb, Aleksander Arsenijeviq, publikoi një video në të cilën shihet intervenimi i Policisë së Kosovës në këtë defilim të maturantëve. Aty një polic u pa tek ndërhyn te një i ri dhe dëgjohet tek i thotë të mos ketë provokime. Në pamje shihet edhe një person që bën shqiponjën.
Teksa policia ka vlerësuar se aktiviteti ka përfunduar qetë dhe pa probleme, nga shoqëria civile në veri, autoritetet në Serbi dhe EULEX-i u konsiderua forcë e tepruar.
