Korporata Energjetike e Kosovës (KEK) ka operuar në një regjim të jashtëzakonshëm prodhimi që nga 19 dhjetori, duke mbajtur në punë paralelisht tre blloqe të Termocentralit Kosova A për plot 31 ditë radhazi.
Sipas të dhënave zyrtare, operimi me tre njësi të Kosovës A është realizuar për 9 ditë gjatë dhjetorit, 20 ditë gjatë janarit dhe 2 ditë në fillim të shkurtit, duke paraqitur një ngarkesë të madhe teknike dhe njerëzore për termocentralin më të vjetër në vend.
Zakonisht, standardi operativ i KEK-ut që nga paslufta ka qenë funksionimi me katër njësi gjeneruese – dy nga Kosova A dhe dy nga Kosova B – ndërsa një njësi ka shërbyer si rezervë për siguri të sistemit energjetik.
Megjithatë, për shkak të rritjes së konsumit dhe nevojës për stabilitet energjetik, KEK ka kaluar në operim të jashtëzakonshëm duke arritur të funksionojë me pesë njësi gjeneruese njëkohësisht për rreth 30 ditë.
Ky operim përfshin tre njësi nga Kosova A dhe dy nga Kosova B, duke kërkuar angazhim maksimal teknik, mirëmbajtje të përshpejtuar dhe mobilizim të vazhdueshëm të stafit.
Ndërkohë, sipas planifikimeve aktuale, njësia A5 pritet të rikthehet në operim brenda disa ditësh, duke i shtuar edhe më shumë kapacitetet prodhuese dhe duke mundësuar vazhdimin e operimit me pesë njësi aktive.
Ky regjim prodhimi konsiderohet një përpjekje kolosale, pasi mbështetet nga puna e rreth 4 mijë punonjësve të KEK-ut, të cilët po operojnë në kushte të ngarkesës maksimale për të mbajtur funksionale kapacitetet energjetike jetike për vendin dhe për të garantuar furnizim stabil me energji elektrike në periudha kritike.
KEK vazhdon të mbetet shtylla kryesore e prodhimit vendor të energjisë dhe garant i sigurisë energjetike të Republikës së Kosovës.
