Hoti thotë se prodhimet janë të siguruara për eksport në BE, shkruan TelegramiSot.
Gjatë kësaj vizite, Hoti duke krahasuar të hyrat në Dogana dhe ATK për janarin e këtij viti dhe janarin e vitit të kaluar është shprehur se Kosova po i kthehet normalitetit.
Por, përveç vonimit në pakot e rimëkëmbjes, ekspertët kanë paralajmëruar se Kosovës do t’i duhen disa vite për t’iu rikthyer normalitetit ekonomik dhe që të sanohen dëmet e shkaktuara nga pandemia.
Gjithashtu, shumë biznese në Kosovë janë mbyllur dhe shumë të tjera rrezikojnë të mbyllen nëse masat e qeverisë vazhdojnë të jenë në fuqi për një kohë të gjatë ose nëse këto masa bëhen më rigoroze.
Por, pavarësisht këtyre fakteve, Hoti po thotë se Kosova po i kthehet ngadalë normalitetit.
“Sot vizitova kompanitë “ARKOS LLC”, “Powerpack Kosovo” dhe “SHEHU”, në Parkun e Biznesit në Drenas, të cilëve u ofrova mbështetjen e Qeverisë për zhvillimin e bizneseve të tyre, pasi që vlerësoj se zhvillimi i sektorit privat është shumë i rëndësishëm për zhvillimin ekonomik të vendit.
Ishte ënaqësi që të vizitosh kompani vendore dhe investitorë të jashtëm që janë vendosur këtu dhe prodhojnë me standardet më të larta të cilësisë, prodhime këto me eksport të siguruar në vende të BE-së.
Vizitën në Drenas e përmbylla me një takim të përbashkët me të gjithë përfaqësuesit e bizneseve, të cilëve u premtova krijimin e lehtësirave për Qasje në Fondin për Garanci Kreditore.”, ka shkruar Hoti.
