Nëna e Astrit Deharit, Xhemile Dehari, ka thënë se ekspertiza ka ardhur nga Zvicra para zgjedhjeve të jashtëzakonshme parlamentare, që u mbajtën më 6 tetor të këtij viti.
“Këtu e kemi zarfin që iu ka ardhë prej Zvicrës, data se kur ka mbërri, se janë ba shumë muhabete se kur ka ardhë. Qe ku e keni, me 4 tetor letra rekomanduese është lëshu prej Zvicrre, qe ku e keni vulën, edhe vulat e tjera që i kanë qitë kur kanë deshtë”, ka thënë ajo para gazetarëve.
Sipas Prokurorisë, në raportin e ekspertizës konstatohet se “hipoteza e një vetëvrasjeje të Astritit përmes mjeteve të caktuara nga mjekët ligjorë duket pak e vërtetë dhe intervenimi i një personi të tretë në proces fatal duhet të kihet parasysh”.
“Nga ajo çfarë u tha, ne vlerësojmë se një hetim i ri është i nevojshëm për t’i qartësuar rrethanat e vdekjes së z. DEHARI Astrit. Ekipet tona dhe laboratorët tona janë në dispozicion të hetuesve të ngarkuar me çështjen”, thuhet në raport