“Ne qëndrojmë me Izraelin. Ne qëndrojmë me Izraelin”, tha presidenti amerikan Joe Biden në një fjalim drejtuar kombit me rastin e sulmit vdekjeprurës nga organizata militante palestineze Hamas ndaj Izraelit.
Ai e quajti sulmin një akt të “të keqes së pastër” dhe theksoi se 14 qytetarë amerikanë ishin në mesin e më shumë se një mijë njerëzve të vrarë në Izrael dhe se amerikanët ishin ndër pengjet e marra nga Hamasi gjatë sulmit të së shtunës.
“Izraeli ka të drejtë të mbrohet”, tha Biden, i cili foli me telefon me kryeministrin izraelit Benjamin Netanyahu menjëherë para fjalimit.
Biden thotë se i ka premtuar Izraelit se Amerika do të dërgojë të gjithë ndihmën që i nevojitet për t’u mbrojtur dhe tha se do t’i kërkojë Kongresit, i cili aktualisht është i bllokuar për shkarkimin e kryetarit të Dhomës së Përfaqësuesve, të ndërmarrë veprime të menjëhershme për të financuar mbrojtjen e sigurisë kombëtare të partnerit të saj. Biden theksoi me vendosmëri se terrorizmi nuk ka justifikim.
“Fatkeqësisht, ngjarjet si kjo nuk janë asgjë e re për hebrenjtë dhe kanë zgjuar kujtime të dhimbshme dhe plagë të shekujve të antisemitizmit dhe gjenocidit”, tha Biden, i cili gjithashtu tha se ishte i tmerruar nga raportet se ekstremistët “torturonin civilë të pafajshëm”.
Presidenti theksoi se demokracitë si Izraeli dhe Shtetet e Bashkuara të Amerikës janë më të forta kur reagojnë në bazë të sundimit të ligjit, ndërsa terroristët “sulmojnë me dashje civilët”.
“Ne do të mbetemi të bashkuar për të ndihmuar popullin e Izraelit kundër urrejtjes, dhunës dhe terrorizmit”, tha Biden. Ai tha gjithashtu se ekipi i tij ka qenë në komunikim të vazhdueshëm me partnerët izraelitë dhe globalë që nga shpërthimi i krizës.
Shtëpia e Bardhë konfirmoi të hënën se tashmë ka filluar dërgimin e municioneve dhe pajisjeve ushtarake në Izrael dhe Pentagoni po analizon inventarin e tij për të parë se çfarë tjetër mund t’i dërgohet shpejt aleatit të Amerikës në luftën kundër Hamasit./Gazeta Express
