Dhuna në familje po vazhdon të mbetet një nga damkat më të mëdha të shoqërisë kosovare. Çdo ditë në Polici raportohen raste ku vajzat e gratë dhunohen në forma të ndryshme nga burrat, djemtë, vëllezërit e anëtarët e tjerë të familjes. Gazeta Sinjali raportoi për një rast të tillë që ka ndodhur para disa ditësh në rrugën ‘Xhevdet Hoti’ në Pejë.
Një 20-vjeçar dyshohet se më 19 prill ka ushtruar dhunë fizike ndaj motrës së tij të mitur dhe ka sulmuar zyrtarët policorë. I riu ka arritur të ikë, duke qëndruar në arrati deri më dje, kur Policia e ka arrestuar.
Sinjali mëson se bëhet fjalë për A.R., i cili është denoncuar nga nëna e tij, e cila njoftoi Policinë se i biri përpos që ka rrahur motrën, ka demoluar elementet e kuzhinës dhe ka thyer televizorin.
Njësitë policore kanë dalë në vendin e ngjarjes, por që nuk kanë arritur që ta arrestojnë të dyshuarin atë ditë, pasi është arratisur nga vendi i ngjarjes. Gjatë ikjes, i riu dyshohet se ka gjuajtur gurë në drejtim të zyrtarëve policorë.
Me urdhër të prokurorit, i riu ndodhet tashmë në ndalim policor dhe i njëjti do të hetohet për veprat penale ‘Dhunë në familje’, ‘Sulm ndaj personit zyrtar’, ‘Asgjësimi apo dëmtim i pasurisë’.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
