Zyra e Prokurorit të Specializuar (ZPS), më 3 prill 2023 dorëzoi versionin e redaktuar publik të dosjes paraprake të korrigjuar në çështjen kundër Hashim Thaçit, Kadri Veselit, Rexhep Selimit dhe Jakup Krasniqit.
I njëjti version është publikuar në gjuhën angleze dhe mund ta gjeni: KËTU.
Ndryshe, sipas urdhrit të 13 shkurtit 2023, trupi gjykues kishte kërkuar që për çdo parashtrim të protokolluar të përmendur në paragrafët e këtij urdhri, ZPS-ja të paraqesë brenda 3 prillit 2023: (a) arsyet që ka për ruajtjen e klasifikimit ekzistues të parashtrimit të protokolluar; (b) versionin publik të redaktuar përkatës; ose (c) një pohim që parashtrimi i protokolluar mund të riklasifikohet si publik në gjendjen aktuale.
Kurse, mbrojtja e Thaçit, Veselit, Selimit dhe Krasniqit përmes këtij urdhri pritet t’i paraqesin të njëjtat brenda 8 majit 2023.
Ndryshe, në seancën e 3 prillit 2023, u dha fjala hyrëse nga Zyra e Prokurorit të Specializuar dhe mbrojtësi i viktimave, Simon Laws.
Po ashtu, në po atë seancë, pas leximit të aktakuzës së ndryshuar nga ana e ZPS-së, ish-presidenti Hashim Thaçi, ish-kryeparlamentarët Kadri Veseli dhe Jakup Krasniqi, si dhe ish-deputeti Rexhep Selimi, u deklaruan të pafajshëm për veprat penale që iu vihen barrë.
Kurse, seanca e 4 prillit 2023 vazhdoi me fjalën hyrëse të mbrojtjes së Thaçit, Veselit dhe Selimit, si dhe deklaratat pa betim të këtyre të fundit.
Në rastin ndaj Thaçit dhe të tjerëve, janë pranuar si viktima në procesin gjyqësor, 140 persona.
Ndërsa, paraqitja e provave, duke nisur edhe thirrja e dëshmitarëve nga ZPS-ja, do të nisë më 11 prill.
Ndryshe, Zyra e Prokurorit të Specializuar, më 30 shtator 2022 ka dorëzuar aktakuzën e konfirmuar të ndryshuar ndaj Hashim Thaçit, Kadri Veselit, Jakup Krasniqit dhe Rexhep Selimit, e cila përbëhet nga dhjetë pika me akuza, ku këta të fundit ngarkohen për krime lufte e krime kundër njerëzimit.
Më 29 prill 2022, Zyra e Prokurorit të Specializuar kishte dorëzuar një aktakuzë të ndryshuar ndaj Hashim Thaçit, Kadri Veselit, Rexhep Selimit e Jakup Krasniqit, ku pretendohet se katër të akuzuarit kanë kryer krime lufte edhe në Gjilan, Budakovë e Semetishtë.
Më 9 nëntor të vitit 2020, në paraqitjet e tyre të para, Jakup Krasniqi e Hashim Thaçi janë deklaruar të pafajshëm për akuzat që u vihen në barrë. Njëjtë është deklaruar edhe Veseli në paraqitjen e tij më 10 nëntor, sikurse edhe Rexhep Selimi më 11 nëntor.
Aktakuza ndaj Hashim Thaçit, Kadri Veselit, Rexhep Selimit dhe Jakup Krasniqit është konfirmuar më 26 tetor 2020.
