Në Ministrinë për Komunitete dhe Kthim, 20 punëtorë janë paguar 103 mijë e 562 euro gjatë një viti edhe pse nuk dolën fare në punë.
Kështu thuhet në raportin vjetor të Zyrës Kombëtare të Auditimit për këtë ministri. Përveç, vijueshmërisë, Auditori ka gjetur se 20 punëtorët nuk kanë dëshmi se kanë kryer ndonjë punë.
“Ne kemi vërejtur që në MKK, mungojnë dëshmitë për vijueshmërinë në punë për njëzet (20) punonjës të saj. Të njëjtit asnjëherë nuk figurojnë në regjistrin e ardhje vajtjeve në punë gjatë vitit 2020 përderisa kompensimi vjetor për këta të punësuar ishte 103,562.40€. Për më tepër, nuk ka dëshmi për realizimin/kryerjen e punëve në përputhje me përshkrimin e detyrave dhe përgjegjësive që u janë ngarkuar”, thuhet në raport.
Sipas ZKA-së, “shkaku i mos paraqitjes në punë të këtyre zyrtarëve ishte mos krijimi i kushteve të duhura për punë, kontrolli i dobët dhe mos monitorimi i tyre nga menaxhmenti i ministrisë.”
Ndërsa, sipas gjetjeve, një zyrtar i kësaj ministrie, udhëheqësi i Divizionit për planifikim të politikave, nuk ishte evidentuar në regjistrin e punëtorëve, pasi sipas zyrtarëve përgjegjës, shkak ishte mungesa e kartelës.
Në raport thuhet se kompensimi i tillë i zyrtarëve e dëmton buxhetin dhe reputacionin e ministrisë në përgjithësi, gjithashtu e rrit rrezikun që organizata të dështojë në realizimin e objektivave të saja.
Prandaj, ZKA rekomandon që ministri duhet të sigurojë kontrolle adekuate në fushën e personelit, të zgjidhë problemin e angazhimit të punonjësve në punë dhe të ndërmerren hapat e duhur për zbatimin e legjislacionit në fuqi duke siguruar menaxhim efikas dhe efektiv të organizatës në drejtim të realizmit të objektivave të saj.
