Policia e Kosovës ka arrestuar sot tetë aktivistë të Partisë Socialdemokrate, përfshirë këtu kreun e kësaj partie, Dardan Molliqaj.
Në arsyetimin e policisë thuhet se të arrestuarit kanë shkruar grafite dhe kanë dëmtuar disa vetura zyrtare, ndërkohë që nga PSD-ja ka thënë se ndaj tyre është përdorur dhunë brutale dhe se përpos të arrestuarve ka edhe të lënduar, shkruan Reporteri.net.
“Policia, nën urdhërat e Kurtit, me përdorim brutal të dhunës po dëshiron të shtyp këdo që kundërshton shefin e tyre. Zhvatja ndaj qytetarëve nuk guxon të kaloj heshtur e nën kërcënimin e dhunshëm e brutal të pushtetit”, thuhet ndër të tjera në reagimin e PSD-së.
Në mesin e të arrestuarve është edhe zyrtari i kësaj partie, Frashër Krasniqi, i cili kishte qenë i akuzuar për terrorizëm lidhur me sulmin me zollë ndaj objektit të Kuvendit të Kosovës në vitin 2016.
Më 17 nëntor të vitit 2017, Gjykata Themelore në Prishtinë e kishte shpallur fajtor Frashër Krasniqin, atë kohë pjesë e VV-së, si dhe tre aktivistët e tjerë të kësaj partie, Atdhe Arifi, Adea Batusha dhe Egzon Haliti, të cilët akuzoheshin për sulmin ndaj Kuvendit të Kosovës.
Për veprën penale të terrorizmit, Frashër Krasniqi ishte dënuar me 8 vjet burgim, Atdhe Arifi ishte dënuar me 6 vjet burgim, Egzon Haliti me 5 vjet e gjysmë si dhe Adea Batusha me 2 vjet heqje lirie.
Mirëpo, në shkurt të vitit 2018, Gjykata e Apelit e kishte kthyer në rigjykim këtë rast, duke ua ndërprerë masën e paraburgimit 4 të akuzuarve.
Seanca e parë lidhur me këtë rast ishte mbajtur në mars të vitit 2020, gati dy vjet pasi Gjykata e Apelit, e ktheu në rigjykim.
Kujtojmë se duke u hetuar për këtë rast ishte edhe Astrit Dehari, derisa u gjet i vdekur në qelinë e tij sa ishte në paraburgim në Prizren.
Frashër Krasniqi, ishte larguar nga Lëvizja Vetëvendosje gjatë vitit 2018, në valën e largimeve të shumta nga kjo parti.
