Deputetja e PDK-së, Blerta Deliu – Kodra, ka reaguar pasi deputetja tjetër, Adelina Grainca, kaloi nga kjo parti në Lëvizjen Vetëvendosje, shkruan Gazeta Sinjali.
Deliu–Kodra u shpreh se dy ditë më parë kishin drekuar së bashku me Graincën ku kishin folur rreth angazhimit në politikë dhe çasjes së saj në angazhimin opozitar.
“Kur pashë lajmet në media dje, nuk arrija të kuptoj asesi, që po e njëjta Adelinë që hapur më foli për çasjen e Vetëvendosjes, po defilonte në seancë me Albin Kurtin! Një e sapoardhur në parti e cila u vlerësua maksimalisht nga të gjithē. E shumë të rinjë aktivistë të devotshëm të PDK-së nuk e patën fatin e sajë, shumë kolege të jashtëzakoshme nuk arritën që të zgjedhen edhe pse dhanë shumë energji e mund”, shkroi ndër të tjera ajo në Facebook.
Sipas saj, për hir të korrektësisë politike, ajo është dashur të bëjë një falënderim dhe kërkim falje kolegëve, kryetarit në detyrë dhe atyre që i besuan për të qenë deputete.
“Krejt në fund, një falënderim dhe kërkim falje kolegëve, kryetarit në detyrë, ferizajasve dhe atyre që të besuan, do të duhej të ishte minimumi i korrektësisë politike. Mos harro se të tradhëtosh besimin qytetarë do të thotë shumë!”, shtoi ndër të tjera ajo.