Para një viti, Mëhill Martini nga Stublla e Vitisë, ishte personi më i përfolur në Kosovë. 77-vjeçari ishte personi i parë i infektuar me koronavirus në vend. Ai kishte rrëfyer për sfidat të cilat i ka kaluar si dhe si e ka përjetuar ndjenjën e të qenit personi i parë i infektuar me koronavirus në Kosovë.
Më 13 mars të vitit të kaluar, u konfirmuan rastet e para me COVID-19 në Kosovë. Personi i parë që u infektua me koronavirus, ishte një i moshuar nga fshati Stubëll i Vitisë.
Bëhet fjalë për Mëhill Martinin, i cili kishte ardhur nga Italia në Kosovë, tetë ditë para se të konfirmohej si i infektuar.
Në një rrëfim për media, 77-vjeçari ka treguar për sfidat të cilat i ka kaluar si dhe si e ka përjetuar ndjenjën e të qenit personi i parë i infektuar me koronavirus në Kosovë.
“Unë kam qenë në Itali, kam qëndru atje për disa muaj. E kam familjen atje. Po ashtu i kryej edhe disa kontrolle mjekësore në Itali. Unë me 5 mars jom kthy në Kosovë. Këtu asgjë s’ka pasë. Më mori malli për djalin, nipat e mbesat. Unë kur jam infektu nuk e kam ditë se çfarë virusi kam marrë. Në frymëmarrje kisha problem, me gjoks, krytë, fyti e të gjitha. Tash jam mirë”, kishte thënë për 77-vjeçari.
Ai kishte treguar për procedurat të cilat i kishte ndjekur pas paraqitjes së simptomave të para të koronavirusit.
“Me datë 12 mars jam shtri në spital, me datë 13 më është konfirmu testi. Kisha mundim. Koka më dhimbte shumë, gjoksi. Kisha vështirësi në frymëmarrje, isha i lodhur. Pas meje u infektua edhe gruaja, po ajo e ka kaluar më lehtë. Tash edhe ajo është mirë me shëndet”, shpjegonte tutje personi i parë i infektuar me COVID në Kosovë.
I moshuari kishte folur edhe për trajtimin që ia kishte bërë stafi shëndetësor në Qendrën Klinike dhe Universitare të Kosovës.
“Në QKUK neve na kanë pritë shumë mirë. Shërimi i mjekëve ndaj nesh ka qenë shumë korrekt. Maskë vnutë nuk kam pasë, kur pata ardhë. Kur unë kam ardhë në Kosovë as në Itali nuk ka pasë raste. Për virusin nuk kisha dëgju asnjëherë më parë”, kishte thënë Martini.
Ndryshe, nga konfirmimi i rasteve të e deri tash, janë infektuar 76 mijë e 110 persona me këtë virus dhe janë regjistruar 1 mijë e 688 raste të vdekjes.
“Numri total i rasteve pozitive është 76.110 raste nga 348.381 persona të dyshimtë në virusin SARS-CoV-2 dhe 1.688 raste të vdekjes. Gjatë 24 orëve të fundit, janë shëruar 512 pacientë derisa numri i përgjithshëm i të shëruarve deri më sot është gjithsej 63.892 raste, kurse numri i rasteve aktive është 10.530”, ka njoftuar IKSHP’ja në raportin e fundit.
