Rrjetet sociale, Facebook dhe Google, do të detyrohen që të paguajnë për lajmet australiane sipas legjislacionit që është miratuar të enjten, transmeton Gazeta Sinjali.
Sipas mediave të huaja, Ligji i parë botëror u kalua lehtësisht pasi qeveria australiane ka rënë dakord që të largojë elementet më të ashpra të kundërshtuar nga gjigandët e teknologjisë, në këmbim të të dyve që ranë dakord të negociojnë marrëveshje me mediat lokale.
Thuhet se kjo hapë rrugën që Google dhe Facebook të japin dhjetëra miliona dollarë në ndërmarrjet e medias lokale dhe që të mund të sigurojë një model për zgjidhjen e konflikteve me rregullatorët në të gjithë botën.
Sipas qeverisë, ky ligj i miratuar do të sigurojë që bizneset e lajmeve do të shpërblehen mjaftueshëm për përmbajtjen që e gjenerojnë, duke e ndihmuar në mbështetjen e gazetarisë me interes publik në Australi.
Google tashmë ka ndërmjetësuar marrëveshje me vlerë miliona dollarë me kompani australiane të mediave, duke përfshirë dy më të mëdhatë: News Corp të Rupert Murdoch dhe Nine Entertainment.
Ndërsa Facebook është treguar më ngurrues – i cili shkurtimisht bëri një ndalim për të gjithë faqet e lajmeve australiane në protestë ndaj ligjit – ka hyrë drejt një marrëveshjeje të parë me Seven West dhe tha se më shumë negociata të tjera janë në proces.
Ndërkohë kompania Facebook premtoi të mërkurën të investojë të paktën 1 miliard dollarë në mbështetje të gazetarisë gjatë tri viteve të ardhshme ndërsa gjigandi i mediave sociale mbrojti qëndrimin ndaj një mosmarrëveshjeje me Australinë lidhur me pagesat për organizatat e mediave.
Nick Clegg, kreu për marrëdhëniet globale, tha në një deklaratë se kompania është e gatshme të mbështesë mediat, por përsëriti shqetësimet e saj mbi pagesat e detyrueshme.
“Facebooku është më shumë se i gatshëm të bashkëpunojë me botuesit e lajmeve”, tha Clegg pasi Facebooku rivendosi informacione lajmesh si pjesë e një kompromisi me zyrtarët australianë.
“Ne vlerësojmë sigurisht se gazetaria cilësore është në qendër të mënyrës sesi funksionojnë shoqëritë e hapura – duke informuar dhe fuqizuar qytetarët dhe duke vënë para përgjegjësisë të fuqishmit”, shtoi ndër të tjera ai.
