Rreth 400 mijë euro janë konfiskuar gjatë aksionit të sotëm policor në Agjencionin për Zhvillimin e Bujqësisë dhe nëpër zyre të ministrisë nëpër qytete. Këtë e bëri të ditur drejtori për Krime Ekonomike, Nezim Sehiti, transmeton Gazeta Sinjali.
Kurse, kryeprokurori Aleksandër Lumezi tha se grumbullimi i informacioneve ka filluar që nga janari.
Ai ka bërë të ditur se janë konfiskuar përveç parave edhe vetura, llaptopë e telefona.
“Pas ndërmarrjes së këtyre masave kemi marrë vendim që të marrim urdhër për bastisje. Pas marrjes së urdhrit nga gjyqtari i procedurës paraprake, kemi bërë bastisjen e lokaleve ku gjatë bastisjeve e kemi arsyetuar kërkesën për kryerjen e tyre. Kemi sekuestruar shumë të madhe të të hollave, vetura, llaptopë, telefona të cilat do të na shërbejnë në procedurat e mëvonshme”, ka thënë Lumezi në një konferencë për media.
Ai ka shtuar se prej 12 personave të arrestuar, 10 janë zyrtarë.
“Të njëjtit dyshohen për keqpërdorim të subvencioneve, keqpërdorim të pozitës zyrtare, dhënie dhe marrje të ryshfetit”.
Lumezi ka paralajmëruar se aksioni do të vazhdojë edhe ditët e ardhshme.
