Njësitet e specializuara të Policisë, të enjten kanë arrestuar në Mitrovicë një diler të madh droge që tash e sa kohe veproi ne veri të këtij qyteti.
“Gjatë realizimit të operacionit policorë janë sekuestruar para në valuta të ndryshme (Euro, Dollarë Amerikanë, Franga, Kruna, Dinarë), sprej si dhe një sasi e substancave të dyshuara narkotike tipi marihuanë e dedikuar për shitje. Paratë e sekuestruara dyshohet se janë të fituara nga shitja e substancave narkotike të cilat gjendeshin të vendosura nëpër zarfe, 81.374 Euro, 6.392. Dinarë, 160 Dollarë Amerikanë, 200 Franga Zvicerane dhe 100 Kruna Suedeze” thuhet në deklarimin e Drejtorisë Policore – Rajoni veri.
Janë sekuestruar dhe disa fletore ku dyshohet se i arrestuari në detaje ka mbajtur shënime për shitjen e drogës.
Përtej kësaj që është raport zyrtar, Klan Kosova merr vesh se personi me inicialet N.P. ra nën prangat e forcave të rendit pasi që një grua e afërt me të bashkëpunoi me hetuesit.
Sipas burimeve, 38 vjeçari është dikush që tash e sa vite kërkohet për kryerjen e veprave të rënda kriminale në Serbi, por se në veri të Kosovës ai tash e sa vite kishte gjetur strehë.
Me vendim të prokurorit ai tashmë është dërguar në mbajtje për procedura të mëtejme ligjore.
