Valbon Krasniqi është zgjedhur në pozitën e drejtorit të Shërbimit Spitalor Klinik dhe Universitar të Kosovës.
Kjo është bërë e ditur përmes një njoftimi nga SHSKUK, ku janë publikuar edhe rezultatet finale të konkursit.
“Komisioni vlerësues për përzgjedhjen e drejtorit të përgjithshëm të Shërbimit Spitalor dhe Klinik Universitar të Kosovës (ShSKUK), bazuar në Ligjin 06/L-114 për Zyrtarët Publikë dhe legjislacionin tjetër në fuqi, ka shpallur rezultatet e konkursit për pozitën e drejtorit të përgjithshëm të ShSKUK-së. Procesi ka qenë transparentë dhe në të kanë marrë pjesë përfaqësuesi nga shoqëria civile, Shoqata për të drejtat e pacientëve, përfaqësuesi i Federatës Sindikale të Shëndetësisë”, thuhet në njoftim.
Në fazën e fundit të këtij konkursi gara u bë mes Krasniqit dhe Basri Lenjanit, pasi tre kandidatë të tjerë ishin larguar nga gara me akuza për parregullsi në këtë konkurs.
Krasniqi është vlerësuar me 34 pikë në test, 8 në CV si dhe 49.2 në intervistë, ndërsa Lenjani mori 19 pikë në test, 10 në vlerësimin e CV-së dhe 46.6 në intervistë.
Lidhur me këto rezultate, kandidatët kanë të drejtë ankese brenda 15 ditëve.
Kujtojmë se Krasniqi ishte kthyer në garën për drejtor të SHSUKUK-së, pasi fillimisht njëherë ishte eliminuar për mungesë të përvojës menaxheriale.
Konkursi në fjalë ishte hapur 25 nëntor të vitit 2020 dhe afati për aplikim ishte 15 ditë.
