Ministrja në detyrë e Drejtësisë, Albulena Haxhiu e ka emëruar pa konkurs si zyrtar ligjor në MD, Dukagjin Nezirin, që është anëtar i Lëvizjes Vetëvendosje.
Në vendimin që e ka siguruar Gazeta Express, e që është nënshkruar dy ditë më parë, Haxhiu e ka emëruar Nezirin, si zyrtar ligjor, derisa sipas këtij vendimi, mandati i tij zgjat deri në fund të mandatit të ministres.
Mirëpo, në fakt, pozita e Zyrtarit Ligjor duhet të bëhet përmes konkursit publik e jo me vetëm aminin e ministrit, si dhe nuk është pozitë e cila varet nga mandati i një ministri.
Në vendim për emërim ministria është thirrur në një nen, që përcakton emërimin nëpunësve në kabinete.
Neni 29 i Ligjit për Organizimin dhe Administrimin e Administratës shtetërore, flet për nëpunësit në kabinete, mirëpo, jo edhe për zyrtarët ligjor sic shkruhet në vendimin e ministres.
Pra, aty theksohet se ministrja mund t’i punësojë deri në katër nëpunës në kabinet të saj.
Gazeta Express ka kërkuar sqarim në Ministrinë e Drejtësisë lidhur me këtë emërim, mirëpo, deri më tani nuk ka marrë përgjigje.
Ministrja në detyrë e Drejtësisë, Albulena Haxhiu e ka pranuar se është bërë lëshim gjatë marrjes së atij vendimi, derisa fajin ja ka lënë Burimeve Njerëzore në MD.
“Para emërimit unë kam pyetur zyrën e burimeve njerëzore , dhe kamë marr konfirmim nga ta se ky emërim nuk shkel ligjin, pastaj është bërë emërimi. Me të parë më media këtë, kam konsultuar zyrën ligjore dhe të njëjti e kanë pranuar se kanë lëshuar këtë dhe unë si ministre e kam anuluar këtë vendim menjëherë”, ka deklaruar Haxhiu për infokus, duke shtuar se Nezirit iu është ndërruar tashmë pozita.
Lidhur me këtë temë, sqarime në Ministri kanë kërkuar edhe na IKD’ja.
Ehat Miftari ka deklaruar se në MD iu kanë bërë të ditur se bëhet fjalë për një gabim teknik.
Miftari thotë se ky është një gabim elementar që nuk duhet të përsëritet.
“IKD ka kërkuar informacion nga MD lidhur me këtë vendim dhe ka marr përgjigje se vendimi është gabim teknik. Me vet faktin që në vendim përmendet se mandati i zotëriut në fjalë lidhet me mandatin e ministres lë për të nënkuptuar dhe e kemi kuptuar se ky është gabim teknik.
Aq më tepër ligji i aplikueshëm për shërbimin civil nuk lejon që sipas këtij vendimi i emëruari të përfitoj nga shërbimi civil. Sigurisht se MD në.raste të tilla duhet të ketë kujdes dhe mos të bëhen gabime.të tilla elementare”, ka deklaruar ai.
Dukagjin Neziri është i afërt me Lëvizjen Vetëvendosje tash e disa vite, derisa, ai ka të publikuara edhe fotografi me kreun e partisë, Albin Kurtin.
Me 20 mars, Ministrja Haxhiu ka bërë të ditur se me të kanë punuar edhe në draftin e parë të koncept dokumentit për konfiskimin e pasurisë së pajustifikueshme.
