Kryeministri në largim, Albin Kurti ka prezantuar pakon emergjente pas situatës që është shkaktuar në vend pas pandemisë me COVID-19.
Kurti në një konferencë për media ka thënë se kjo pako është për situatën emergjente në të cilën ndodhet vendi dhe se një pako tjetër për rimëkëmbjen e ekonomisë do të përpilohet më vonë, shkruan Telegramisot.com
“Pako fiskale emergjente për të ofruar ndihmë financiare shtesë për shtresat më të varfra, të ndihmojë bizneset në shërbimet operative.
Kjo pako nuk ka si qëllim politikat afatgjata për rimëkëmbjen e ekonomisë, për këtë do të hartohet një pako e dytë”, është shprehur Kurti.
Ndërkaq ministri i Financave, Besnik Bislimi tha se nuk ka logjikë që të përpilohet pako afatgjatë pa e ditur se sa do të zgjasë kriza.
“Pakoja emergjente është pakoja më e mirë në rajon.
Merreni dhe krahasojeni. Kjo është arsyeja pse të gjithë mekanizmat ndërkombëtarë po dëshirojnë të na ndihmojnë. Nuk ka logjikë të përpilojmë pako afatgjate pa e ditur se sa do të zgjasë kriza.
Ne duhet të kujdesemi që këtë fazë ta kalojmë me humbje sa më të vogla. Fatkeqësisht një pjesë të kredive nuk do të mund ti marrim në këtë kohë ngase Kuvendi ka vendosur ta bllokojë punën e Qeverisë.
Alokimi 25 milionësh nga Banka Botërore është bllokuar nga Parlamenti. Në vend të bllokadës duhet ti bashkojmë energjitë që të dalim nga kriza, por harrojeni se mund ta paralizoni Qeverinë.
Pajtohem që për pakon për ringjalljen e ekonomisë na duhet përkrahje pak më e gjerë”, u shpreh Bislimi.
