Sipas të dhënave të Universitetit “Johns Hopkins”, numri i personave të infektuar me koronavirus në mbarë botën ka shkuar në mbi 1 milion e 850 mijë, ndërsa numri i të vdekurve në 114,245.
Shtetet e Bashkuara vazhdojnë të mbesin vendi me më së shumti persona të infektuar – mbi 557 mijë. Pas tyre vjen Spanja me 166 mijë të infektuar dhe në vendin e tretë Italia me 156 mijë të prekur.
Sa i përket viktimave, Shtetet e Bashkuara prapë ndodhen në vendin e parë me mbi 22 mijë viktima. Në vendin e dytë është Italia me 19,899 të vdekur dhe e treta është Spanja me 17,209 të vdekur. Franca është e katërta me 14,393 viktima.
Spanja po përgatitet që t’i largojë kufizimet dhe ta riaktivizojë një pjesë të ekonomisë. Ditëve të fundit, numri i viktimave të reja në këtë shtet ka rënë, por kryeministri Pedro Sanchez paralajmëroi se vendi është ende larg fitores ndaj pandemisë, shkruan “The Guardian”, transmeton Telegramisot.com
Kina e ka raportuar numrin më të lartë të infektimeve për periudhën njëditore në pesë javët e fundit. Atje të dielën u regjistruan 108 raste të reja, ndërsa të shtunën ishin konfirmuar 99 raste. Sa për krahasim, të premten ishin shënuar vetëm 46 infektime të reja.
