Lami Balaj nga Sindikata e Pavarur e Postës dhe Telekomit të Kosovës, ka deklaruar se nuk do të ketë zvogëlim pagë për punëtorët e PTK-së.
Balaj në Sytë 7 deklaroi se sot presin të marrin pagat ashtu siç e kanë të caktuar që t’i marrin me datën 5.
“Sigurisht se ka pasur vonesa të pagave në kohë, kjo është proklamuar më shumë para Vitit të Ri për vonesa mirëpo pagat kanë dalë para festës dhe sot presim të marrim pagat pra me datën 5 siç e kemi me ligj – nuk do të ketë zvogëlim të pagave të paktën jo momentalisht”.
Balaj deklaroi se ka nevojë për reforma dhe se pret që me ardhjen e Qeverisë Kurti çështja e PTK-së të rregullohet.
“Për të bërë reformat duhet të ketë rikonstruktim të përgjithshëm në Telekom, pa largimin e politikës në çështjet që nuk duhet të ketë duar nuk do të ketë reforma”.
“Pritjet ndaj Qeverisë janë të mëdha, ne nga të gjitha qeveritë deri tani kemi prit shumë – Kurti duhet të marrë më shumë përgjegjësi për Telekomin.
Qeveritë e tjera janë interesuar vetëm kur kanë pas interes kur nuk kanë pas nuk janë marrë me të. Shpresojmë që me ardhjen e Qeverisë Kurti do të jetë më mirë”.
“Qeveria duhet të marrë përgjegjësi duke e menaxhuar më mirë, duke kontrolluar njerëzit që punojnë aty. Mirëpo pa u përzi në mikromenaxhim, po ashtu duhet të kërkojë përgjegjësi për kontratat e dëmshme si dhe të bëjë hulumtim të thellë për këtë”.
Balaj mes tjerash tregoi se në vazhdimësi kanë kërkuar dhe se ka nevojë për hetime në Telekom.
“Ne kemi kërkuar në vazhdimësi hetime në Telekom, e gjithë kjo ka ndodh që kur Telekomi udhëhiqet nga institucionet e Kosovës, për këtë një pjesë të kontratave të dëmshme i kemi dërguar tek Krimet Ekonomike. Ka qindra kontrata që na nuk mundemi me i pa, për këtë duhet hetime që dikush të japë përgjegjësi se çka ka ndodh me kompaninë”.
Balaj mes tjerash foli edhe 5 milionët e kërkuar – kërkesa e cila është refuzuar nga Qeveria Haradinaj.
“5 milionë janë kërku për të bërë investime e pse nuk janë nda e dijnë më mirë nga qeveria dhe ministria. Kërkesa jonë ka qënë e mëhershme na kemi kërku jo para shtesë mirëpo një garancion për kredi”.
