Në një reagim ekskluziv dhe për herë të parë publik, Deme Elashani nga fshati Ozdrim i Pejë ka mohuar kategorikisht çdo përfshirje të tij në vrasjen e Ilir Selimajt me familje, si dhe në vrasjen e Ismet Kelmendit, përmes një letre publike drejtuar familjeve dhe opinionit.
Në letrën e tij, Elashani shprehet me tone të forta emocionale dhe betohet në varrin e babait të tij dhe në varret e dëshmorëve të Ushtria Çlirimtare e Kosovës, duke theksuar pafajësinë e tij të plotë.
“Unë, nënës së Ilir Selimit dhe gjithë atyre që janë prekur nga vdekja e tyre, ju betohem në vorrin e Adem Arif Elshani dhe në vorret e gjithë dëshmorëve të Ushtrisë Çlirimtare të Kosovës se nuk kam as hak e as hile në këtë punë. Nuk kam gisht as unë e as Avi Elezi në vrasjen e Ilir Selimit, as në vrasjen e Ismet Kelmendit e as të atyre vajzave të vogla që janë vrarë para dere në Pejë. Ju betohem para Kombit e para Zotit. Këto janë vetëm nxitje të tradhtarëve dhe fundërrinave shqiptare.”
Në këtë reagim, Elashani jo vetëm që mohon çdo përfshirje personale, por pretendon se akuzat ndaj tij janë rezultat i, siç i quan ai, “nxitjeve dhe shpifjeve të elementeve tradhtare”.
Kjo është hera e parë që ai del publikisht me një deklarim të tillë, duke e kthyer këtë reagim në një zhvillim të rëndësishëm për opinionin publik dhe për familjet e viktimave.
Deri më tani, nuk ka pasur reagim zyrtar nga organet e drejtësisë lidhur me këtë letër publike.
Demë Elashani këtë reagim e ka bërë përmes një letre të gjatë publike, të postuar në rrjetin social me emrin e vëllaut të tij të vrarë, Virgjil Elshani.
Ky reagim vjen në kontekstin e konfliktit të rëndë dhe me pasoja tragjike ndër vite mes familjes Elashani dhe familjes se Ismet Kelmendi.
Nga ky konflikt ka pasur shumë viktima, megjithatë, në letrën e tij publike, Demë Elashani mohon kategorikisht përfshirjen në disa prej vrasjeve: Atë të familjes së Ilir Selimajt vrasjen e Ismet Kelmedit dhe te disa vajzave te mitura duke deklaruar se nuk ka pasur asnjë rol apo dorë në to. Shkruan Telegramisot.com
