Shtetet e Bashkuara dhe Kina kanë vlerësuar përparimin e bisedimeve tregtare të zhvilluara në Kuala Lumpur, duke rritur shpresat për një marrëveshje që do të ulë tensionet mes dy fuqive ekonomike më të mëdha në botë.
Zyrtarët nga të dy vendet deklaruan të dielën se janë afër arritjes së një marrëveshjeje, pas disa raunde bisedimesh të mbajtura në kuadër të samitit të ASEAN-it në Malajzi.
Presidenti amerikan Donald Trump dhe lideri kinez Xi Jinping pritet të takohen të enjten në kuadër të samitit të APEC-ut në Gyeongju, Kore e Jugut, takimi i tyre i parë ballë për ballë që prej vitit 2019.
Sekretari amerikan i Thesarit, Scott Bessent, tha se palët kanë rënë dakord për një “kornizë” të përbashkët që do të diskutohet në takimin e ardhshëm të nivelit të lartë.
Në intervista për NBC dhe ABC News, ai shtoi se marrëveshja e mundshme do të parandalojë aplikimin e tarifave 100 për qind ndaj mallrave kineze dhe do të shtyjë zbatimin e kufizimeve të eksportit që Pekini kishte paralajmëruar për metalet e rralla, shkruan AlJazeera transmeton Klan Kosova.
Sipas Bessent, Kina ka pranuar gjithashtu të bëjë blerje të konsiderueshme të produkteve bujqësore amerikane, përfshirë sojën, gjë që do t’i gëzojë fermerët amerikanë.
Nga ana tjetër, zëvendëskryeministri kinez He Lifeng deklaroi se palët kanë arritur një “konsensus bazë” për adresimin e shqetësimeve të ndërsjella dhe do të punojnë për finalizimin e detajeve dhe miratimin përfundimtar brenda vendeve të tyre.
Tensionet tregtare SHBA-Kinë janë rritur ndjeshëm muajt e fundit. Pekini kishte njoftuar se nga 1 dhjetori do të kërkonte licenca eksporti për magnetët e tokave të rralla dhe materialet gjysmëpërçuese që përmbajnë elementë të prodhuar në Kinë.
Këto masa kishin ngjallur frikë për pengesa serioze në zinxhirët globalë të furnizimit.
Në kundërpërgjigje, Trump kishte paralajmëruar vendosjen e tarifave të reja deri në 100 për qind ndaj mallrave kineze nga 1 nëntori.
