Një incident i ndërlikuar është raportuar mbrëmë në fshatin Tvrgjan të Leposaviqit, ku pas ndërhyrjes së policisë është zbuluar një rast që përfshin armëmbajtje pa leje dhe kanosje me jetë.
Ngjarja ka ndodhur më 11 tetor 2025, rreth orës 21:45, pasi një qytetar nga lagjja Çukarak kishte kërkuar ndihmën e policisë. Njësitë policore, pasi kanë mbërritur në vendin e ngjarjes, kanë kontaktuar me një grua që ishte shumë e shqetësuar dhe hezitonte të fliste, por pas bindjes nga zyrtarët policorë, ajo ka pranuar të bashkëpunojë dhe ka treguar se në shtëpinë e vëllait të saj ndodheshin disa persona problematikë që kishin kanosur një të ri, i cili më pas u identifikua si L.M. rreth 19-vjeçar
Gjatë kontrollit në shtëpi, policia ka legjitimuar disa persona të pranishëm dhe ka vërejtur një karikator pistolete në brez te dëshmitarja, e cila më pas ka treguar vendin ku ishte fshehur arma. Aty është gjetur dhe sekuestruar një pistoletë me një karikator pa fishek, që sipas saj i përkiste të dyshuarit L.M.
Fillimisht, i riu nuk ishte bashkëpunues dhe kishte mohuar të ishte kanosur, por pas mbërritjes së avokatit mbrojtës dhe gjatë deklaratës me shkrim, ai ka treguar se dy persona, A.S. dhe N.V., e kishin kërcënuar me fjalët “Kam me të mbytë” dhe “Kam me ta vra krejt familjen”.
Në konsultim me Prokurorin e Shtetit, rasti është kualifikuar si “Mbajtje në pronësi, kontroll ose posedim i paautorizuar i armëve” dhe “Kanosje”.
Hetimet për zbardhjen e plotë të rrethanave të rastit janë në vazhdim.
