Gazeta Sinjali raportoi pak më parë për arrestimin e dy personave si të dyshuar për rastin e rrëmbimit që tronditi kryeqytetin më 18 shtator 2025, në Veternik të Prishtinës.
Sinjali mëson ekskluzivisht se bëhet fjalë për: Isak Foniqi, rreth 32-vjeçar, Granit Toplana, rreth 30-vjeçar.
Dyshja dyshohet se rreth orës 23:00, pranë pompës së derivateve “Valoni Petrol” në Veternik, e morën me dhunë M.O.,rreth 42-vjeçar, të cilin më pas e dërguan në një shtëpi të pabanuar në Fushë Kosovë.
Aty, viktima është mbajtur peng gjatë gjithë natës dhe ndaj tij dyshohet se është ushtruar edhe forcë fizike.
Fillimisht, rasti ishte cilësuar si “Shkaktim i rrezikut të përgjithshëm”, por pas zhvillimeve të hetimeve dhe konsultimit me prokurorin kujdestar, është ricilësuar si “Rrëmbim”.
Me vendim të Prokurorit nga Departamenti i Krimeve të Rënda, të dyshuarit janë dërguar në mbajtje, ndërsa hetimet për këtë rast po vazhdojnë.
Sinjali do të ju informojë me detaje të tjera nga ky rast i rëndë.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
