Një rast i të shtënave me armë ka alarmuar sot policinë në fshatin Bardh i Madh, rruga “Maxhera”, në komunën e Fushë Kosovës.
Burime të Sinjalit bëjnë të ditur se policia ka identifikuar dhe arrestuar të dyshuarin Jon Rashica, i cili është shoqëruar në stacion dhe është intervistuar në praninë e avokatit mbrojtës sipas detyrës zyrtare.
Gjatë marrjes në pyetje, ai ka pranuar se kishte përdorur një pistoletë , për të cilën nuk posedonte leje. Njësia e Forenzikës ka sekuestruar armën, një karikator dhe pesë gëzhoja.
Pas konsultimit me Prokurorin e Shtetit, rasti është iniciuar për veprat penale “Mbajtja në pronësi, kontroll ose posedim i paautorizuar i armëve” dhe “Përdorimi i armës apo mjetit të rrezikshëm”.
Shënim: Personi i apostrofuar në këtë artikull prezumohet i pafajshëm derisa fajësia e tij të mos provohet me vendim të formës së prerë nga gjykata.
