Presidentja e Kosovës, Vjosa Osmani, ka nxjerrë një dekret me të cilin harmonizohet lista e organizatave të huaja terroriste të shpallura nga Shtetet e Bashkuara të Amerikës.
Osmani tha se ky dekret është nxjerrë me qëllim të linjëzimit të plotë të Kosovës me politikën e jashtme dhe të sigurisë së ShBA-së.
“Republika e Kosovës harmonizon listën e organizatave të huaja terroriste me Urdhrat Ekzekutiv të Presidentit të Shteteve të Bashkuara të Amerikës, me Nr. EO 14157 të datës 20 janar 2025, dhe EO 14175 të datës 22 janar 2025, me qëllim të linjëzimit të plotë me politikën e jashtme dhe të sigurisë të Shteteve të Bashkuara të Amerikës”, tha ajo.
Sipas dekretit, “ngarkohen institucionet e sigurisë së Republikës së Kosovës dhe të gjitha institucionet e tjera relevante, që të ndërmarrin hapat e nevojshëm për zbatimin e këtij Dekreti në përputhje me kompetencat e tyre”.
Po ashtu, “ngarkohet Sekretariati i Këshillit të Sigurisë së Republikës së Kosovës që të përcjellë kopjen e këtij Dekreti tek të gjithë anëtarët e Këshillit të Sigurisë së Kosovës”, thuhet në dokument.
Për cilat organizata dhe kartele bëhet fjalë?
Më 20 janar, ai lëshoi urdhrin ekzekutiv për të futur në listën e organizatave të huaja terroriste: Cártel del Golfo , Cártel de Jalisco Nueva Generación, Cártel de Sinaloa, Cártel del Noreste, Carteles Unidos, La Nueva Familia Michoacana, Mara Salvatrucha (MS-13) dhe Tren de Aragua.
Ndërkaq, përmes urdhrit të 22 janarit, SHBA-ja shpalli sërish organizatë terroriste Ansar Allah, apo rebelët Huthi në Jemen. Ky grup ka mbështetjen e Iranit.
Gjatë mandatit të tij të parë presidencial, Trump e kishte shpallur rebelët Huthi si organizatë të huaj terroriste, por ai vendim ishte shfuqizuar nga administrata e Joe Bidenit për shkak të shqetësimeve se një gjë e tillë mund të pengonte dërgimin e ndihmave të domosdoshme në Jemen.
Edhe në të kaluarën, Kosova ka harmonizuar listat e organizatave terroriste me ato të shpallura nga SHBA-ja. Një hap të tillë ndërmori më 2020, kur shpalli Hezbollahun e Libanit organizatë terroriste.
