Prishtinë, 5 gusht 2025 – Një hap i madh drejt një Prishtine të ngrohtë, efikase dhe të gjelbër është hedhur mbrëmë, kur Kryeshefi Ekzekutiv i Termokosit, Fisnik Osmani, së bashku me Kryetarin e Komunës, Përparim Rama, prezantuan publikisht studimin për alternativat e zgjerimit të rrjetit të ngrohjes në të gjitha zonat urbane të kryeqytetit.
Studimi përfshin 11 zona kryesore urbane, të cilat aktualisht nuk mbulohen nga rrjeti i Termokosit dhe nuk janë pjesë e projekteve aktuale të zgjerimit. Në këto zona janë analizuar mbi 13,900 ndërtesa dhe rreth 3.9 milionë metra katrorë sipërfaqe banimi dhe hapësirash shërbimi – një shifër që dëshmon për shkallën e gjerë dhe rëndësinë strategjike të këtij plani.
Zonat e përfshira janë ndarë në dy pjesë kryesore:
➤ Pjesa Veriore e Prishtinës:
Kodra e Trimave
Medreseja
Zona përreth Gjimnazit “Ahmet Gashi” – rruga për Kolovicë
Xhamia e Llapit
Dragodani
Tasligje
Tokbashqe
Velania
➤ Pjesa Jugore e Prishtinës:
Hajvalia
Prishtina e Re
Lagja pas Gorenjës
Lagjja “Qëndresa”
Lagjja “Qershia”
Ky projekt synon jo vetëm përfshirjen e gjithë qytetit në sistemin qendror të ngrohjes, por edhe uljen e ndotjes, kursimin e energjisë dhe rritjen e cilësisë së jetës për qytetarët.
“Termokos po i jep kuptim Prishtinës së Gjelbër,” – theksoi Kryeshefi Fisnik Osmani gjatë prezantimit, duke vënë në pah angazhimin e ndërmarrjes për zhvillim të qëndrueshëm dhe përfshirës.
Ky studim hap rrugën për zgjerime të reja strategjike që do të ndikojnë direkt në jetën e mijëra qytetarëve, duke e shndërruar Prishtinën në një model të qytetit evropian të së ardhmes.”
