Gjatë javës së kaluar, zyrtarët policorë të Drejtorisë Rajonale në Prishtinë kanë zhvilluar një sërë aktivitetesh në kuadër të angazhimeve për rritjen e sigurisë publike dhe zbatimin e urdhëresave të gjykatave. Në aksione të ndara dhe në lokacione të ndryshme, Policia ka realizuar gjithsej 109 urdhëresa gjykate, nga të cilat 46 kanë qenë për vepra penale, ndërsa të tjerat kanë pasur të bëjnë me kundërvajtje, seanca gjyqësore, verifikime dhe obligime të tjera ligjore.Sipas komunikatës për media, në përputhje me urdhëresat, personat që ishin të dënuar me burgim janë dërguar për vuajtjen e dënimit, ndërsa ata që ishin të dënuar me gjobë janë liruar, pasi kanë kryer obligimet që u ishin caktuar me vendime të gjykatës.
Krahas zbatimit të urdhëresave, aktivitetet policore janë shtrirë edhe në sfera të tjera të sigurisë. Në të njëjtin hark kohor, njësitë policore kanë sekuestruar 16 armë zjarri të llojeve dhe kalibrave të ndryshëm, si dhe qindra copë municion. Armët janë konfiskuar gjatë kontrolleve në raste të ndryshme që ndërlidhen me posedim të paautorizuar dhe vepra të tjera penale.Ndërkohë, një fokus i veçantë u është kushtuar edhe shkeljeve në trafikun rrugor.
etëm gjatë kësaj periudhe, Policia ka shqiptuar 4520 gjoba për kundërvajtje të ndryshme, përfshirë tejkalime shpejtësie, mosrespektim të shenjave të trafikut dhe shkelje të tjera të Kodit Rrugor. Nga këto, 498 janë evidentuar përmes teknologjisë së veturës inteligjente dhe radarit mobil, duke dëshmuar rritjen e efikasitetit në mbikëqyrjen e qarkullimit rrugor.Policia e Kosovës thekson se do të vazhdojë me veprimet konkrete në terren për forcimin e rendit dhe sigurisë publike, duke u bërë thirrje qytetarëve që të respektojnë ligjet dhe të bashkëpunojnë në çdo rast që kërkon ndërhyrje ose parandalim të ndonjë rreziku.
