Një përleshje fizike mes dy personave ka ndodhur ditën e djeshme në qendër të Pejës, e cila ka eskaluar në sulm me mjet të mprehtë, duke alarmuar qytetarët dhe Policinë.
Burimet e Gazetës Sinjali brenda hetuesisë bëjnë me dije se rasti është shënuar më 11 korrik 2025, rreth orës 17:20, në rrugën “Nëna Terezë”, ku një patrullë policore që po patrullonte në këmbë ka hasur në dy persona që ishin duke u përleshur.
Zyrtarët policorë kanë ndërhyrë menjëherë, kanë vendosur situatën nën kontroll dhe kanë arrestuar të dyshuarin, i cili është identifikuar si Ton Dodaj, rreth 55-vjeçar ndërkohë që viktima Ahmet Baraku rreth 41-vjeçar është dërguar me urgjencë për trajtim mjekësor.
Sipas deklarimit të viktimës, gjithçka ka ndodhur brenda lokalit “Sahat Kulla”, ku Dodaj e ka sulmuar me thikë, duke i shkaktuar lëndime trupore.
Në vendin e ngjarjes kanë dalë hetuesit dhe krimtekniku, të cilët kanë kryer ekzaminimet e nevojshme dhe kanë sekuestruar provat relevante.
Lidhur me rastin është njoftuar Prokurori i Shtetit, i cili ka urdhëruar që ndaj të dyshuarit të iniciohet rasti “Lëndim i rëndë trupor”, si dhe të caktohet masa e ndalimit për 48 orë.
