Një rast i nisur nga një foto e publikuar në rrjetet sociale para një viti ka çuar në nisjen e hetimeve ndaj një të riu nga komuna e Vushtrrisë, i cili është parë duke mbajtur një pushkë gjahu në dorë.
Burimet e Gazetës Sinjali mësojnë se më 07.07.2025, rreth orës 11:30, përmes kanaleve zyrtare është pranuar informatë se B.K., kishte postuar në rrjetin social Facebook, në opsionin “Story”, një fotografi me një armë të gjatë.
Pas verifikimeve të Policisë dhe me urdhër të prokurorit kujdestar, njësitë policore kanë ndërmarrë veprime në terren dhe kanë intervistuar të dyshuarin, i cili ka sqaruar se fotografia është bërë në vitin 2024, gjatë një vizite me dajën e tij në mal dhe arma në fjalë ishte pronë e dajës së tij, e cila posedonte leje të rregullt.
Policia ka shkuar edhe te pronari i armës, i cili ka prezantuar pushkën bashkë me lejen e posedimit, ndërsa është intervistuar si dëshmitar.
Pushka është konfiskuar përkohësisht dhe më vonë i është kthyer pronarit, ndërsa ndaj të riut që kishte bërë postimin është iniciuar rasti për “Mbajtje në pronësi, kontroll ose posedim të paautorizuar të armës”.
Rasti është nën hetim dhe Sinjali do të raportojë për çdo zhvillim të ri.
