Presidenti amerikan Donald Trump tha të mërkurën se ShBA-ja do të vendos tarifa prej 20% për importet nga Vietnami sipas një marrëveshjeje të re tregtare të arritur gjatë negociatave të minutës së fundit.
Një taksë shumë më e lartë prej 46% do të hynte në fuqi javën e ardhshme si pjesë e planit global tarifor që Trump njoftoi në prill. Dhjetëra ekonomi të tjera, përfshirë Bashkimin Evropian dhe Japoninë, ende po përpiqen të bëjnë marrëveshjet e tyre me ShBA-në para rritjeve të planifikuara.
Sipas marrëveshjes, Vietnami nuk do të vendosë tarifa për produktet amerikane, tha Trump në një postim në rrjetet sociale.
Tarifat zakonisht rrisin çmimet që u ngarkohen blerësve, gjë që nga ana tjetër mund të ulë kërkesën.
“Marrëveshja e Madhe e Bashkëpunimit”, siç e quajti Trump, do të vendosë gjithashtu një tarifë më të lartë prej 40% për mallrat që kalojnë nëpër Vietnam në një proces të njohur si “transport”.
“Vietnami do të bëjë diçka që nuk e ka bërë kurrë më parë, t’u japë Shteteve të Bashkuara të Amerikës QASJE TË PLOTË në Tregjet e tyre për Tregti”, postoi Trump në platformën e tij Truth Social.
Fillimisht, Trump vendosi taksa të larta mbi partnerët tregtarë në të gjithë botën në prill, duke përmendur mungesën e “reciprocitetit”, por më pas njoftoi një pauzë ku të gjitha taksat u ulën në 10%.
Shumë vende më pas iu drejtuan ShBA-së për të negociuar marrëveshje tregtare, sipas Shtëpisë së Bardhë.
Që nga prilli, Uashingtoni deri më tani kishte njoftuar vetëm një pakt me Britaninë dhe një marrëveshje për të ulur përkohësisht taksat hakmarrëse me Kinën.
