Një tjetër operacion policor është finalizuar me sukses në kuadër të luftës kundër krimit të organizuar ndërkombëtar. Policia shqiptare ka arrestuar shtetasin O.K., 20 vjeç, banues në Ballsh, i shpallur në kërkim ndërkombëtar nga autoritetet italiane, shkruan Gazeta Sinjali.
Operacioni i koduar “Operacionalja 51” është zhvilluar nga Forca e Posaçme Operacionale në bashkëpunim të ngushtë me Policinë italiane dhe rrjetin ENFAST. Arrestimi u bë në aksin rrugor “Fier–Vlorë”.
Sipas autoriteteve italiane, O.K. është pjesë e një organizate kriminale të përfshirë në trafik droge. Gjykata në L’Aquila i ka caktuar masën e sigurisë “arrest në burg”, për veprën penale “Trafikimi i lëndëve narkotike”, për të cilën parashikohet një dënim deri në 24 vjet burgim.
Autoritetet shqiptare po vijojnë procedurat për ekstradimin e tij drejt Italisë.
